Ўзбекистон Суперлигасининг сўнгги, 26-туридан ўрин олган баҳсда Наманганнинг “Навбаҳор” клуби ўз майдонида Андижоннинг “Андижон” жамоасини қабул қилди.
Водий дербиси мақоми, мезбонларда Ўзбекистон кубоги финалидаги мағлубият учун реванш олиш ва совринли ўринларга даъвогарлик қилиш имконияти туфайли ушбу ўйинга қизиқиш юқори бўлди. Севимли жамоасини қўллаб-қувватлаш учун Андижондан ҳам кўплаб мухлислар келди.
Кескин беллашувларга бой ўтган ўйинда ҳисобни очиш меҳмонларга насиб этди. 52-дақиқада эса андижонликлар жарима майдончаларида Жамшид Болтабоевга нисбатан қўполлик ишлатди ва Жамшид Искандеров пенальтини аниқ амалга ошириб, ҳисобни тенглаштирди.
Ўйиннинг 58-дақиқасида Йован Жокич “Навбаҳор”ни ҳисобда олдинга олиб чиқди, 61-дақиқада эса Рустам Турдимуродов андижонликларнинг навбатдаги ҳужумини самарали якунлаб, ҳисобни 2:2 кўринишига келтирди.
71-дақиқада Ислом Маматказин тўпни “Навбаҳор” дарвозабони Элдор Суюновнинг устидан ошириб, дарвозага йўллади ва андижонликлар яна ташаббусни қўлга олди.
Учрашувнинг 2-бўлимига тўхталишлар учун 6 дақиқа қўшиб берилди. 90+6-дақиқада Жамшид Искандеровнинг жарима зарбасидан сўнг Русланбек Жиянов тўпни боши билан дарвозага аниқ йўллаб, ҳисобни тенглаштирди — 3:3.
Шу тариқа, “Навбаҳор” клуби “Андижон”дан реванш олиш имкониятини бой берган бўлса-да, ўзи учун ўта муҳим дурангни қайд этди ва Суперлиганинг бронза медалига эга бўлди.
“Дарё” ушбу ўйиндан фотогалерея тайёрлади.
Изоҳ (0)