2024-yilning 1-noyabr kuni dunyo modasining yulduzi va Hindiston kinosining durdonasi, model va aktrisa Ayshvariya Ray 51 yoshini nishonladi. 1994-yilda u “Dunyo go‘zali” unvonini qo‘lga kiritadi va darhol kino olamida faoliyatini boshlaydi. Shuningdek, u Tyusso xonim muzeyiga mum haykali qo‘yilgan birinchi hindistonlik ayol ham.
Bo‘lajak yulduz chayon burji ostida, savdo floti ofitseri Krishna Ray va yozuvchi Vrinda Ray oilasida dunyoga kelgan. Ayshvariyaning Aditya Ray ismli akasi ham bor.
1998-yilda “Qalbim seniki, jonim” filmida suratga tushadi, bu film keyinchalik Bollivud klassikasiga aylanadi. Ammo suratga olish maydonidagi partnyori Salmon Xon unga chin yurakdan oshiq bo‘lib, aktrisaning qo‘lini so‘raydi. Go‘yo to‘y bo‘ladiganday edi: Xonning oilasi uning tanlovini qo‘llab-quvvatlagan, qiz esa sevgilisining opa-singillari va ota-onasi bilan yaqin bo‘lib qolgan edi. Biroq Salmon oila qurishni taklif qilganida aktrisa rad javobini beradi.
U o‘sha paytda turmushga chiqishga tayyor emasdi. Bu holat aktyorga shunchalik qattiq ta’sir qiladiki, u bir zumda oshiqdan dushmanga aylanadi. Bollivudning eng yorqin juftligi o‘rtasida janjallar, hatto qo‘pollik va zo‘ravonliklar bo‘lib o‘tganini barcha muxlislar bilishardi. Salmon mast holda sevgilisining uyiga kelib, qo‘li qonga belangunga qadar eshikni mushtlardi, otasiga qo‘pol so‘zlar aytib, o‘zini nomaqbul tutardi. Ayshvariya Salmondan ajralgach, aktyor Vivek Oberoy bilan uchrasha boshlaydi, shunda Xon unga ham hujum qilib, erkaklar o‘rtasida mushtlashuv sodir bo‘ladi.
Barcha shov-shuvlar 2007-yilda Ayshvariya Ray hamkasbi Abhishek Bachchanga turmushga chiqqanida tugaydi. O‘sha vaqtda aktrisa allaqachon jiddiy oilaviy munosabatlarga tayyor edi. 2010-yilda u karyerasida tanaffus qilishini e’lon qiladi va oradan ko‘p o‘tmay, ular farzand kutayotgani ma’lum bo‘ladi.
Shifokorlarning fikricha, 38 yoshida tug‘ish xavfli bo‘lishi mumkin edi. Ammo Ayshvariya og‘riqni qoldirish yoki kesarcha kesishdan qat'iyan voz kechadi va tabiiy yo‘l bilan tug‘ishni tanlaydi. Qizi Aaradhya dunyoga kelganidan so‘ng esa muxlislari sevimli aktrisalariga tanqidlar yog‘dira boshlashadi. Gap shundaki, tug‘uruqdan keyin Ayshvariya vazn yig‘a boshlaydi va ko‘plab ayollar kabi u ham birdaniga ozishga harakat ham qilmaydi.
-c6quj6T8-swGfU4uQ.webp)
Hindistonda asosan g‘arbda mavjud bo‘lgan tug‘uruqdan keyin darhol ozish odati yo‘q. “Ayshvariya darhol qaddi-qomatini tiklaydigan ayollardan, masalan, Viktoriya Bekhemdan o‘rnak olsa bo‘lardi”, deb yozadi obunachilari. Hattoki ba'zi heyterlar uning “avval” va “keyin” suratlarini tahqirlovchi videolar bilan tarqatishadi.
Aktrisa haqiqiy kuchli shaxs sifatida bu adolatsiz tanqidlarga bardosh bera oldi va o‘ziga bo‘lgan ishonchini yo‘qotmadi. U qomatini asta-sekin tikladi. 2024-yilda Ayshvariyaning Kann kinofestivalida qizil gilamdagi chiqishi katta shov-shuvga sabab bo‘ldi.
Ammo aynan shu voqea yana mish-mish va gumonlarni keltirib chiqardi. Chunki yulduz suratga tushish marosimiga eri Abhishek Bachchan bilan kelmagandi, shundan so‘ng OAV darhol ularning ajrashish arafasida ekanini yozdi. Ayshvariya Rayning qaynona bilan kelisholmayotgani haqida esa allaqachon mish-mishlar yurardi. Abhishek bir necha yil avval oilaviy mojarolar tufayli ota uyidan chiqib, alohida uyga ko‘chib o‘tgandi. Shunga qaramay, Bollivudning eng mashhur juftligi ajrashayotgani haqidagi gaplar tinmayapti, biroq hozircha bu ma’lumot rasman tasdiqlangani yo‘q.
Izoh (0)