Shridevi Bollivudning eng go‘zal va yorqin yulduzlaridan biri edi – u 4 yoshga to‘lib-to‘lmay filmlarda rol ijro eta boshlagan, qo‘shiq kuylab, raqs tushib, muxlislarning eʼtiborini o‘ziga qaratgandi. Aktrisa ijodiy faoliyati mobaynida naq 300 ta filmda turli rollarni ijro etgan. Shridevi nafaqat Hindiston, balki dunyoning turli burchaklarida yashovchi kino shinavandalarining ko‘nglidan joy olgan aktrisa hisoblanadi. Sohibjamol ijodkorning kutilmagan vafoti uning yaqinlari va muxlislari uchun haqiqiy zarba bo‘lgani mubolag‘a emas. Ijodkorning o‘limiga doir tergov ishlari haligacha yakuniga yetmagan: Shridevining Dubay shahriga to‘y marosimida ishtirok etish uchun borib, to‘satdan vafot etishi bilan bog‘liq masala hamon jumboqligicha qolmoqda.
1963-yilda dunyoga kelgan tamil millatiga mansub aktrisaga oila aʼzolari Shri Amma Yanger Ayyapan deb ism berishgan. Aktrisaning onasi oddiygina uy bekasi, otasi esa advokat bo‘lib, qo‘g‘irchoqdek tashqi ko‘rinishga ega qizidagi aktyorlik mahoratini uning bolalik yillaridanoq payqagan. Qizaloq o‘ta yoqimtoy bo‘lish bilan birga ziyrak va uquvli edi: u tamil tilidan tashqari hind, telugu, malaya tillarida ham so‘zlasha olgan. Bu esa aktrisaga kelgusida faqat hind tilidagi filmlar ishlovchi kinostudiyalar bilan hamkorlik masalasida cheklanib qolmaslikka imkon bergan. Aktrisa o‘z davrining eng kelishgan aktyorlari – Rami Rao, Anil Kapur, Amitabh Bachchan, Mitxun Chakrabortilar bilan rollar ijro eta boshladi. “Karma”, “Qasos”, “Janob Hindiston”, Muhabbat lahzalari” kabi muvaffaqiyatli loyihalarda ishtirok etdi. Hind kinosi muxlislari tomonidan haligacha sevib ko‘riladigan “O‘g‘ri Chandu” filmidagi roli uchun aktrisa bir nechta nufuzli mukofotlarni qo‘lga kiritdi.
Shridevining tashqi ko‘rinishi har tomonlama benuqson edi: uning yuz tuzilishi qadimgi hind mumtoz suratlaridagi go‘zallar qiyofasini yodga solardi.
Charos ko‘zlar, qalin lablar, chiroyli shaklga ega burun... Aktrisaning dushmanlari uning burni plastik jarrohlar yordamida shu ko‘rinishga keltirilgani haqida mish-mish tarqatgan bo‘lsa-da, Shridevining rasmiy vakillari aktrisa hech qachon plastik jarrohlik amaliyotlaridan foydalanmaganini ta’kidlaydi. Shridevi milliy liboslar, anʼanaviy taqinchoqlarni yaxshi ko‘rgan va umrining oxirigacha Bollivud go‘zallarining haqiqiy timsoli bo‘lib qolgan.
Shridevining shaxsiy hayotida ham barchasi aʼlo darajada edi – har qalay tashqaridan shunday ko‘rinardi. U taniqli prodyuser Boni Kapur bilan oila qurib, ikki nafar qiz farzandni dunyoga keltirdi. Oilasiga ko‘proq vaqt ajratish maqsadida ijodda bir muddat tanaffus qildi: 1997-yildan keyin 15 yil mobaynida birorta ham filmda rol ijro etmadi. Ammo ijodiy tanaffus aktrisaning mashhurligiga zarracha taʼsir ko‘rsatmadi.
2015-yilda Bollivud yulduzi o‘zining 300-filmi – “Ona” kartinasida bosh rolni ijro etdi. Shundan keyin filmlarga prodyuserlik qilish bilan shug‘ullandi, faqatgina rol ijro etish bilan cheklanmay, filmlar suratga olish niyati borligini ham maʼlum qildi.
Biroq aktrisa ushbu rejalarini amalga oshira olmadi. 2018-yili jiyanining Dubay shahrida o‘tkazilgan to‘y marosimiga tashrif buyurgan aktrisa do‘konlarni ko‘zdan kechirish uchun yana bir necha kun BAAda qolishga qaror qildi va tez orada... xonasidagi hammomdan suvga cho‘kkan holda topildi. Ekspertiza tekshiruvi aktrisaning qonida alkogol bo‘lganini aniqladi. Ushbu maʼlumot Shridevining yaqinlarini ham, unga mehr qo‘ygan muxlislarni ham hayratga soldi – aktrisa har doim odob-axloq qoidalarini mahkam tutar, hech qachon spirtli ichimliklar isteʼmol qilmasdi.
Tergov aniq xulosa taqdim eta olmadi va bir necha bor qayta tiklandi. Shridevining yaqinlari haligacha uning o‘limi baxtsiz hodisa bo‘lganiga ishonmaydi. Ommaviy axborot vositalari esa ijodkor turmush o‘rtog‘i tomonidan o‘ldirilgan degan taxminni ilgari surdi. Bunga Boni Kapurning so‘nggi kunlarda o‘zini shubhali tutgani sabab bo‘ldi: u har doim sayohatlarga rafiqasi bilan birga borgan, ammo bu safar to‘y marosimiga kelmagan. Baxtsiz hodisa sodir bo‘lishidan avval esa kutilmaganda Dubayda paydo bo‘lib qolgan. Aktrisaning jonsiz tanasini vannaxonadan topgan ham Boni Kapur edi – u rafiqasi hammomga kirib ketganda televizorda kriket o‘yinini tomosha qilgan, qimmatli vaqtni boy bergan va hech narsani eshitmagan.
Tergov aktrisaning kuch ishlatish natijasida o‘ldirilgani haqidagi taxminni rad etdi, Boni Kapurga qarshi ayblov eʼlon qilinmadi. Tergov ishlari bugungi kunga qadar davom etmoqda, ammo anchadan beri ishga doir yangi maʼlumot eʼlon qilinmadi. Aktrisaning sirli o‘limi sababi hali beri topilmasa ham kerak...
Izoh (0)