Ukraina Yevropa qo‘llab-quvvatlagan tinchlik rejasi doirasida jangovar harakatlarni to‘xtatishga va Rossiya armiyasi nazorat qilayotgan hududlardan voz kechishga tayyor. Bu haqda The Telegraph xabar berdi.

Prezident Vladimir Zelenskiy dastlab yevropalik hamkorlarini hududiy yon bosishni nazarda tutuvchi har qanday kelishuvni rad etishga chaqirgandi. Shunga qaramay, u Rossiya allaqachon egallab olgan yerlarining bir qismini saqlab qolishi mumkinligini istisno etmadi.
Bu front chizig‘ini hozirgi ko‘rinishida “muzlatib qo‘yish”ni, ya’ni Lugansk, Donetsk, Zaporojye, Xerson viloyatlari hamda Qrimning egallangan hududlari ustidan nazoratni Rossiyaga o‘tkazishni anglatadi. Yon bosish ehtimoli AQSH va Rossiya rahbarlarining 15-avgust kuni Alyaskada bo‘lib o‘tadigan uchrashuvi arafasida muhokama qilinishi mumkin.
Reja faqat Rossiya qurolli kuchlari nazoratidagi hozirgi pozitsiyalarga taalluqli bo‘lishi mumkin, dedi G‘arb rasmiylaridan biri.
Ukraina va Yevropa davlatlari Zelenskiy ishtirokisiz Tramp va Putin urushni to‘xtatish bo‘yicha kelishib olishidan xavotirda.
Menda ko‘plab xavotirlar va ko‘plab umidlar bor, dedi Polsha bosh vaziri Donald Tusk.
AQSH vakillari muzokaralar oldidan Yevropa yetakchilari bilan maslahatlashishga va’da bergan. Yevropada eng katta xavotir uyg‘otayotgan narsa — Moskva taklif qilgan tinchlik rejasi. U frontni Ukrainaning janubi-sharqida “muzlatish”ni nazarda tutadi. Bu rejaga ko‘ra, Kiyev Donetsk va Lugansk viloyatlaridagi o‘z nazoratidagi hududlardan chekinishga rozi bo‘lishi kerak.
Yevropa diplomatlariga ko‘ra, Putin urushdagi maqsadlarini o‘zgartirmagan. U Ukrainadagi Yevropa tarafdori bo‘lgan hukumatini ag‘darib, uning o‘rniga Moskvaga sodiq “qo‘g‘irchoq rejimni” o‘rnatmoqchi.
AQSH Urushni o‘rganish instituti ma’lumotiga ko‘ra, Rossiya hanuz Kiyevning “to‘liq taslim bo‘lishini” talab qilmoqda. Bu talablar qatoriga NATOga a’zo bo‘lmaslik va Ukrainani qurolsizlantirish ham kiradi.
Zelenskiy Putin urushni tugatishiga ishonmayapti
11-avgust kuni Ukraina prezidenti tinchlik muzokaralari yaqinlashayotganiga qaramay, Rossiyaning urushni tugatishga tayyorligi bo‘yicha hech qanday belgilarni ko‘rmayotganini aytdi.
Aksincha, ular yangi hujumlarni boshlash uchun qo‘shin va kuchlarini ko‘chirmoqda, dedi u Ukraina razvedkasi ma’lumotlariga asoslanib.
Ukraina, hatto hududlarining bir qismidan voz kechishga rozi bo‘lsa ham, tinchlik bitimi qurollar yetkazib berish va NATOga a’zo bo‘lish imkoniyatini saqlab qolishi kerak.
Izoh (0)