Janubiy Koreya Ukrainani qayta tiklashga o‘z hissasini qo‘shishda davom etish niyatida. Bu haqda 21—22-fevral kunlari Rio-de-Janeyroda bo‘lib o‘tgan G20 yig‘ilishida Janubiy Koreya tashqi ishlar vaziri Cho Tae Yol maʼlum qildi. Bu haqda ‘‘TASS’’ xabar berdi.
Cho Tae Yol Ukrainadagi mojaroga tezroq barham berish, G‘azo sektorida xalqaro qonunlarga rioya qilish va Qizil dengizdagi provokatsiyalarni to‘xtatish zarurligini aytgan. Vazirga ko‘ra, mamlakatda Ukrainada birdamlik va tinchlik tashabbusi eʼlon qilingan, unga asosan hukumat Ukrainani qayta tiklash va tinchlikka qaytishiga harakat qilmoqda.
Vazir, shuningdek, G20 mamlakatlari iqlim o‘zgarishi, barqaror rivojlanish va raqamli transformatsiyalar bilan bog‘liq global muammolarni hal qilishda hamkorlikni kuchaytirish uchun geosiyosiy qarama-qarshilikdan voz kechishni taʼkidlagan.
Avvalroq Koreya Kiyevga gumanitar va moliyaviy yordam ko‘rsatgan va qurol-yarog‘ bo‘lmagan harbiy buyumlar yetkazib bergan. Janubiy Koreya prezidenti Yun Sek Yol iyul oyida Ukrainaga tashrifi chog‘ida insonparvarlik yordami, xavfsizlikni qo‘llab-quvvatlash va mamlakatni qayta tiklashda hamkorlikni o‘z ichiga olgan Ukraina birdamlik va tinchlik tashabbusini e’lon qilgan edi.
Izoh (0)