AQSH va Xitoy savdo muzokaralari 90 kunga kechiktirilib, 10-noyabrga qoldirilgani ma’lum qilindi. Bu haqda BBC xabar berdi.
Tegishli qo‘shma bayonot ikki davlat o‘rtasida rejalashtirilgan kelishuv muddatdan bir necha soat oldin e’lon qilingan. Xususan, AQSH prezidenti Donald Tramp 11-avgust kuni “bojxona sulhini uzaytirish to‘g‘risidagi farmon”ni imzolagan. Bu qaror natijasida Vashington Xitoy mahsulotlariga 145 foizlik, Xitoy esa Qo‘shma Shtatlardan kelayotgan tovarlarga 125 foizlik tariflarni joriy etishni yana kechiktiradi. Amaldagi kelishuvga ko‘ra, AQSH xitoylardan keladigan import mahsulotiga 30 foizlik, Pekin esa amerika tovarlariga 10 foizlik bojni saqlab qoladi.
Oq uy bu kechiktirish “savdo nomutanosibligini bartaraf etish” va “adolatli savdo amaliyotini ta’minlash” borasida muzokaralarga qo‘shimcha vaqt berishini bildirmoqda. Ma’lumot o‘rnida, Qo‘shma Shtatlarning Xitoy bilan savdo taqchilligi 2024-yilda qariyb 300 milliard dollarni tashkil etgan, bu esa juda yuqori ko‘rsatkich ekani ta’kidlanmoqda.
Iyul oyida bo‘lib o‘tgan muzokaralar “konstruktiv” deb baholangan edi. O‘shanda Xitoyning bosh muzokarachisi ikki tomon ham sulhni saqlab qolishga intilayotganini aytgan. AQSH rasmiylari esa yakuniy qarorni prezident Donald Trampdan kutayotganini bildirgan.
Bu ikki gigant davlat o‘rtasidagi savdo tarangligi 2025-yil aprel oyida keskin kuchaygandi. Tramp bir qator davlatlarga, jumladan Xitoyga ham rekord darajadagi savdo bojlarini joriy etgan. Pekin esa bunga javoban tariflarni oshirib, o‘zaro savdoni deyarli to‘xtatib qo‘ygan. May oyida tomonlar ayrim choralarni bekor qilishga kelishgan.
Hozirgi muzokaralarda tomonlar nodir yer metallari, Rossiya neftini sotib olish va chiplar savdosini cheklash kabi masalalarni muhokama qilishda davom etmoqda. Tramp so‘nggi kunlarda ushbu eksport cheklovlarining bir qismini yumshatib, AMD va Nvidia kabi kompaniyalarga ayrim chiplarni Xitoyga sotishga ruxsat berdi. Buning evaziga kompaniyalar o‘z daromadining 15 foizini Qo‘shma Shtatlar hukumatiga o‘tkazadi. Shuningdek, Vashington TikTok’ni Xitoy kompaniyasi ByteDance’dan ajratib olishga intilmoqda, Pekin esa bunga qarshi chiqmoqda.
Oq uy ma’lumotlariga ko‘ra, bojxona sulhiga qaramay, ikki davlat o‘rtasidagi savdo oqimida 2025-yil kamayish qayd etilgan. Jumladan, yilning dastlabki 6 oyida AQSH Xitoydan 165 milliard dollarlik mahsulot olib kirgan bo‘lib, bu 2024-yilga nisbatan 15 foiz kam degani. Vashingtonning Xitoyga eksporti esa 20 foizga qisqargan.
Izoh (0)