OpenAI kompaniyasi ChatGPT Plus obunachilari uchun GPT-4o modelini qayta ishga tushirganini ma’lum qildi. Bunga joriy yil 7-avgustda taqdim etilgan yangi GPT-5 modeliga foydalanuvchilarning keskin salbiy munosabati sabab bo‘ldi. Dastlab “barcha versiyalar imkoniyatlarini birlashtirgan universal model” sifatida tanishtirilgan GPT-5 ishga tushgach, bir qator jiddiy texnik muammolar yuzaga kelgan.
GPT-5 ning asosiy yangiligi sifatida taqdim etilgan real vaqt rejimida ishlovchi avtomatik yo‘naltirish tizimi nosoz ishlagan. Unga ko‘ra, tizim oddiy savollar uchun tezkor rejimdan foydalanishi, murakkab vazifalarni esa chuqur tahlil orqali hal qilishi lozim edi. Foydalanuvchi sozlamalarni qo‘lda o‘zgartirishi shart emas, balki algoritmning o‘zi kerakli hisoblash darajasini belgilashi kerak edi.
Ammo GPT-5 ishga tushganning ilk soatlaridanoq nosozliklar soni ortib bordi. OpenAI bosh direktori Sem Altman AMA platformasida bu holatni tasdiqlab, shunday dedi:
“Avtomatik yo‘naltirish tizimi ishlamay qoldi, shu sababli GPT-5 foydalanuvchilarga ancha sust va noaniq javob qaytardi”.
Taqdimot davomida yana bir xato yuz berdi: jonli efirda namoyish etilgan diagrammada SWE-bench Verified test natijalari noto‘g‘ri ko‘rsatilib, GPT-5 imkoniyatlari haddan tashqari bo‘rttirib yuborilgani aniqlandi. Altman keyinchalik ijtimoiy tarmoq X dagi postida buni “chartlar bo‘yicha eng katta xatolik” deb atadi.
Tanqidlar ortidan OpenAI bir nechta choralarni ko‘rmoqda. Kompaniya endilikda foydalanuvchilar so‘rovlariga qaysi model javob berish jarayoni yanada shaffof bo‘lishini va’da qilmoqda. Altmanning so‘zlariga ko‘ra, “qaror qabul qilish tizimi” takomillashtirilmoqda, shunda foydalanuvchilar so‘rovlariga tezkor va eng mos model javob beradi.
“Biz tizimni takomillashtirish ustida ishlashni davom ettiramiz va foydalanuvchilarning fikr-mulohazalarini inobatga olamiz”, dedi Altman yakuniy so‘zida.
Izoh (0)