“Liverpul” va Misr terma jamoasi hujumchisi Muhammad Saloh mersisaydliklar klubi rahbariyatidan haligacha shartnomani uzaytirish bo‘yicha taklif olmaganini aytdi.
TBR Football xabariga ko‘ra, tomonlarning shartlari o‘rtasida tafovutlar borligi sabab “Liverpul” haligacha Salohga taklif yubormagan. Misrlik futbolchi yangi shartnoma 3 mavsumga amal qilishini istamoqda. “Qizillar” rahbarlari Salohning yoshini inobatga olgan holda potentsial kelishuv muddatidan xavotirda. Futbolchi yozda 33 yoshga to‘ladi. Tomonlar hozirda tafsilotlarni muhokama qilishmoqda. Agar yechim topilmasa, Saloh mavsum oxirida “Liverpul”ni erkin agent sifatida tark etadi.
32 yoshli Muhammad Saloh 2017-yilning yozidan buyon “Liverpul”da o‘ynamoqda. Mersisaydliklar klubi tarkibida misrlik hujumchi Angliya Premyer Ligasi, Chempionlar Ligasi, ichki kuboklar va FIFA Klublar o‘rtasidagi Jahon chempionatida g’olib chiqdi.
Joriy mavsumda Muhammad Saloh “Liverpul” safida barcha musobaqalarda 18 ta o‘yin o‘tkazib, 12 ta gol urdi va 10 ta golli uzatmani amalga oshirdi.
Izoh (0)