“Ливерпуль” ва Миср терма жамоаси ҳужумчиси Муҳаммад Салоҳ мерсисайдликлар клуби раҳбариятидан ҳалигача шартномани узайтириш бўйича таклиф олмаганини айтди.
ТБР Football хабарига кўра, томонларнинг шартлари ўртасида тафовутлар борлиги сабаб “Ливерпуль” ҳалигача Салоҳга таклиф юбормаган. Мисрлик футболчи янги шартнома 3 мавсумга амал қилишини истамоқда. “Қизиллар” раҳбарлари Салоҳнинг ёшини инобатга олган ҳолда потенциал келишув муддатидан хавотирда. Футболчи ёзда 33 ёшга тўлади. Томонлар ҳозирда тафсилотларни муҳокама қилишмоқда. Агар ечим топилмаса, Салоҳ мавсум охирида “Ливерпуль”ни эркин агент сифатида тарк этади.
32 ёшли Муҳаммад Салоҳ 2017 йилнинг ёзидан буён “Ливерпуль”да ўйнамоқда. Мерсисайдликлар клуби таркибида мисрлик ҳужумчи Англия Премьер Лигаси, Чемпионлар Лигаси, ички кубоклар ва FIFA Клублар ўртасидаги Жаҳон чемпионатида ғолиб чиқди.
Жорий мавсумда Муҳаммад Салоҳ “Ливерпуль” сафида барча мусобақаларда 18 та ўйин ўтказиб, 12 та гол урди ва 10 та голли узатмани амалга оширди.
Изоҳ (0)