Xalqaro jinoiy sudning (XJS) Isroil bosh vaziri Benyamin Netanyaxu va sobiq mudofaa vaziri Yoav Galantni hibsga olishga order berish haqidagi qaroriga javoban Isroil suverenitetini G‘arbiy sohilgacha uzaytirish taklif qilindi. Mazkur taklifni Isroilning o‘ta o‘ngchi Milliy xavfsizlik vaziri Itamar Ben-Gvir ilgari surdi.
“Ushbu hibsga olish orderlariga javoban Yahudiya va Samariyaning (G‘arbiy sohil) butun hududiga suverenitetni kengaytirish, G‘arbiy sohildagi Falastin milliy ma’muriyati bilan aloqalarni uzish, shuningdek, sanksiyalar qo‘llash lozim”, deb yozdi Ben-Gvir Telegram’dagi kanalida.
Avvalroq XJS Netanyaxu va Galantni G‘azodagi harbiy jinoyatlarda ayblanib hibsga olishga order bergan edi. Qaror 2023-yil 8-oktyabrdan 2024-yil 20-mayga qadar sodir etilgan “insoniyatga qarshi jinoyatlar va harbiy jinoyatlar” yuzasidan qabul qilingan.
Sud, shuningdek, Isroilning o‘z fuqarolariga qarshi order berish bo‘yicha sud yurisdiksiyasiga e’tiroz bildirmoqchi bo‘lgan dalillarini ham rad etgan. Isroil ham Falastindagi vaziyat bilan bog‘liq ishlar bo‘yicha XJS yurisdiksiyasiga qarshi chiqdi.
Aksariyat isroillik siyosatchilar va turli siyosiy arboblar bu qarorni keskin qoraladi.
Isroil prezidenti Isaak Gersog XJKning order berish haqidagi qarorini “vijdonga to‘g‘ri kelmaydigan va hayratga soladigan” deb atadi.
“Bu qaror demokratiya va erkinlikdan ko‘ra terror va yovuzlik foydasiga tanlov bo‘lib, adliya tizimining o‘zini HAMASning insoniyatga qarshi jinoyatlari uchun qalqonga aylantirdi”, dedi u.
Netanyaxu idorasining maslahatchisi Dmitriy Gendelman XJSni Isroil pozitsiyasiga e’tibor bermaganlikda va Eron boshlagan mintaqadagi urushni qo‘llab-quvvatlaganlikda aybladi.
“XJK antisemitizm ohanglari bilan to‘liq dezinformatsiya kampaniyasini qo‘llab-quvvatlashga qaror qildi, uning maqsadi Isroilni o‘z ittifoqchilaridan ajratib qo‘yish va mamlakatimizga qarshi terrorchilik hujumlariga ko‘maklashishdan iborat”, deydi Gendelman.
Izoh (0)