AQSHning amaldagi prezidenti Jo Bayden kelasi yilning 20-yanvarida prezidentlik muddati boshlanadigan Donald Trampning inauguratsiyasida ishtirok etishini tasdiqladi.
“Prezident saylov g‘olibining inauguratsiyasida ishtirok etishga va’da berdi. U va birinchi xonim bu va’dasini bajaradi”, dedi Oq uy matbuot kotibi Endryu Beyts.
Bayden inauguratsiyada ishtirok etish demokratik qadriyatlarga sodiqlik va hokimiyatni tinch yo‘l bilan topshirish muhimligini ko‘rsatishini ta’kidlagan.
Tramp 2020-yilgi saylovlarda Baydenning g‘alabasini tan olishdan bosh tortib, uning inauguratsiyada ishtirok etishdan bosh tortgan edi. Shundan so‘ng Tramp Kapitoliyga bostirib kirishda ayblandi.
Bayden 13-noyabr kuni Oq uyda Tramp bilan uchrashuv chog‘ida siyosatchilar hokimiyatni tinch yo‘l bilan topshirish zarurligi haqida kelishib olgan.
Shuningdek, ular yana boshqa bir qator masalalarni muhokama qildi.
“Siyosat — og‘ir ish. Bu ko‘p hollarda turli to‘polonlarga sabab bo‘ladi. Lekin bu safar unday emas. Men jarayon iloji boricha silliq o‘tishini qadrlayman”, dedi Tramp.
Tramp 5-noyabr kuni bo‘lib o‘tgan prezidentlik saylovlarida g‘alaba qozondi. U XIX asrdan beri to‘rt yillik tanaffusdan so‘ng Oq uyga qaytgan birinchi AQSH prezidenti bo‘ldi.
Donald Tramp 2025-yil 20-yanvarda inauguratsiyadan so‘ng ishga kirishadi
Izoh (0)