AQSHning saylangan prezidenti Donald Tramp qurolli kuchlar safidagi barcha transgender harbiylarni ishdan bo‘shatishga olib keladigan farmon chiqarishni rejalashtirmoqda. Bu haqda manbalarga tayanib, The Times xabar berdi.
Amaldagi harbiy xizmatchilar orasida 15 mingga yaqin transgender bor, ular tibbiy ko‘rsatkichlarga ko‘ra xizmatga yaroqsiz deb topilgani uchun ishdan bo‘shatiladi. Yangi farmon 2018-yil mart oyida Trampning birinchi prezidentlik muddatida chiqarilgan farmondan qat’iyroq bo‘ladi. Amaldagi prezident Jo Bayden 2021-yil yanvar oyida o‘zidan oldingi prezidentning qarorini bekor qilgandi.
O‘shanda Tramp transgenderlarga armiyaga kirishni taqiqlagan va allaqachon xizmat qilayotgan transgenderlar faoliyatiga to‘sqinlik qilmagan. Ammo bu safar qurolli kuchlarda karyera qilganlar ham ishdan bo‘shatiladi.
Bu odamlar armiya yetarli darajada odam yig‘a olmayotgan bir paytda ketishga majbur bo‘ladi. Faqat dengiz piyodalari korpusi o‘z raqamlarini bajarmoqda va farmon ta’sir ko‘rsatadigan ba’zi odamlar juda yuqori lavozimlarni egallagan, deydi nashr suhbatdoshi.
Harbiy xizmatdagi transgenderlarning aniq soni ma’lum emas. Bu Pentagonning maxfiylik siyosati hisoblanadi.
15 mingdan ortiq harbiyning to‘satdan ishdan bo‘shatilishi, ayniqsa o‘tgan yili harbiylar 41 ming yangi askar qabul qilish rejasini bajara olmaganini hisobga olsak, jangovar bo‘linmalarga ma’muriy yukni oshiradi, bo‘linmalarning jipsligiga putur yetkazadi va muhim ko‘nikmalar bo‘yicha bo‘shliqlarni yanada chuqurlashtiradi, dedi Zamonaviy Amerika harbiylari uyushmasi ijrochi direktori Reychel Branaman.
U bu qaror bilan bog‘liq moliyaviy xarajatlar, shuningdek, rahbarlik qobiliyatlariga ega tajribali xodimlarning yo‘qotilishini prognoz qildi. Ularning o‘rnini to‘ldirish uchun esa “ehtimol 20 yil va milliardlab dollarlar talab etilishi” mumkin.
Izoh (0)