Jogorku Kenesh deputati Emil Jamg‘irchiyev 24-yanvar kuni Bishkekning Pervomayskiy tuman sudiga keltirildi. Bu haqda “AKIpress” xabar berdi.
O‘zbekiston bilan chegarani noqonuniy kesib o‘tganlik uchun Bosh prokuratura tomonidan qo‘zg‘atilgan jinoyat ishi doirasida unga nisbatan ehtiyot chorasi tanlanishi mumkin. 10-yanvar kuni Qirg‘iziston parlamenti Bosh prokurorga Jamg‘irchiyevni jinoiy javobgarlikka tortishga rozilik berdi.
Shuningdek, Milliy xavfsizlik davlat qo‘mitasi rahbari Qamchibek Tashiyevning so‘zlariga ko‘ra, O‘zbekistonda deputatga nisbatan ikki ish qo‘zg‘atilgan: davlat chegarasini noqonuniy kesib o‘tish va firibgarlik faktlari bo‘yicha. Tashiyev Jamg‘irchiyev chegarani noqonuniy kesib o‘tib, o‘zbekistonlik kriminal avtoritet Salimboy bilan uchrashganini aytgan.
“Salimboy Emil Jamg‘irchiyev uning oldiga kelganini tasdiqladi. U Qirg‘iziston rasmiylari o‘rtasida nizolar ko‘payganini aytib, Salimboydan tartib o‘rnatish uchun yordam so‘ragan. Biroq Salimboy Qirg‘izistondagi ishlarga aralasha olmasligini aytgan. Bizning deputat Salimboydan yordam so‘rabgina ortiga qaytmasdan, uning yordamchisini ham aldagan.
Bir necha kun mehmonxonada tunab, pulini to‘lamay qochib ketgan. Shu sababli O‘zbekistonda Jamg‘irchiyevga nisbatan firibgarlik va davlat chegarasini noqonuniy kesib o‘tish moddalari bilan jinoyat ishi qo‘zg‘atilgan”, — dedi Milliy xavfsizlik davlat qo‘mitasi rahbari Jogorku Kenesh yig‘ilishida.
Tergov maʼlumotlariga ko‘ra, Jamg‘irchiyev Jogorku Keneshning yettita hujjatini O‘zbekistondagi tanishiga topshirgan. Lekin bu hujjatlar nima haqda ekanligi nomaʼlum.
O‘z navbatida, Qirg‘iziston prezidenti deputat Salimboydan “ikki do‘st”ni yo‘q qilishni so‘raganini aytgan.
U Salimboy laqabli kriminal avtoritet Salim Abduvaliyev bilan uchrashib, “ikki do‘st”ni yo‘q qilishga yordam berishni so‘ragan. Tegishli fakt bo‘yicha tergovni Milliy xavfsizlik davlat qo‘mitasi xodimlari O‘zbekiston maxsus xizmatlari bilan birgalikda olib borgan. Natija qanday bo‘lishi meni xavotirga solmagandi, — deydi Qirg‘iziston prezidenti.
Kaktus.media nashrining ta’kidlashicha, qirg‘izistonliklar mamlakat prezidenti Sadir Japarov va Milliy xavfsizlik davlat qo‘mitasi rahbari Qamchibek Tashiyevni “ikki do‘st” deb atashadi.
Izoh (0)