Qirg‘izistonlik sobiq deputat Emil Jamg‘irchiyev 2022-yilning dekabr oyida noqonuniy tarzda O‘zbekistonga o‘tib, Toshkentga kelib, Salimboy nomi bilan tanilgan tadbirkor Salim Abduvaliyevdan yordam so‘ragandi. Qirg‘iziston prezidenti Sadir Japarov “Kabar”ga bergan intervyusida ayrim tafsilotlar haqida ma’lumot berdi.
Sadir Japarov voqeadan xabardor bo‘lganini ma’lum qildi. Qirg‘iziston prezidentiga berilgan maʼlumotlarga ko‘ra, xalq deputati Qirg‘iziston-O‘zbekiston davlat chegarasini noqonuniy kesib o‘tgan.
“U Salimboy laqabli kriminal avtoritet Salim Abduvaliyev bilan uchrashib, ‘ikki do‘st’ni yo‘q qilishga yordam berishni so‘ragan. Tegishli fakt bo‘yicha tergovni Milliy xavfsizlik davlat qo‘mitasi xodimlari O‘zbekiston maxsus xizmatlari bilan birgalikda olib borgan. Natija qanday bo‘lishi meni xavotirlantirmagandi”, — dedi Qirg‘iziston prezidenti.
Kaktus.media nashrining ta’kidlashicha, qirg‘izistonliklar mamlakat prezidenti Sadir Japarov va Milliy xavfsizlik davlat qo‘mitasi rahbari Qamchibek Tashiyevni “ikki do‘st” deb atashadi.
Emil Jamg‘irchiyev Qirg‘iziston Respublikasi Jinoyat kodeksining 378-moddasi 1-qismi (Qirg‘iziston Respublikasi davlat chegarasini noqonuniy kesib o‘tish)da nazarda tutilgan jinoyatni sodir etganlikda gumon qilinmoqda. Parlament uni jinoiy javobgarlikka tortishga rozi bo‘lgan.
Yig‘ilishda Milliy xavfsizlik davlat qo‘mitasi raisi Qamchibek Tashiyev Emil Jamg‘irchiyev chegarani noqonuniy kesib o‘tib, o‘zbekistonlik kriminal avtoritet Salimboy bilan uchrashganini aytgan. Ammo maxsus xizmatlar rahbari Jamg‘irchiyevni qamamaslikka va’da bergan.
Qamchibek Tashiyev taʼkidlashicha, Jamg‘irchiyev Salimboyga bir qancha maktub yozib, Qirg‘iziston rasmiylari o‘rtasida o‘zaro nizo kuchayganini aytgan.
“Salimboy Emil Jamg‘irchiyev uning oldiga kelganini tasdiqladi. U Qirg‘iziston rasmiylari o‘rtasida nizolar ko‘payganini aytib, Salimboydan tartib o‘rnatish uchun yordam so‘ragan. Biroq Salimboy Qirg‘izistondagi ishlarga aralasha olmasligini aytgan. Bizning deputat Salimboydan yordam so‘rabgina ortiga qaytmasdan, uning yordamchisini ham aldagan.
Bir necha kun mehmonxonada tunab, pulini to‘lamay qochib ketgan. Shu sababli O‘zbekistonda Jamg‘irchiyevga nisbatan firibgarlik va davlat chegarasini noqonuniy kesib o‘tish moddalari bilan jinoyat ishi qo‘zg‘atilgan”, — dedi Milliy xavfsizlik davlat qo‘mitasi rahbari Jogorku Kenesh yig‘ilishida.
Tergov maʼlumotlariga ko‘ra, Jamg‘irchiyev Jogorku Keneshning yettita hujjatini O‘zbekistondagi tanishiga topshirgan. Lekin bu hujjatlar nima haqda ekanligi nomaʼlum.
Maʼlumot uchun, Emil Jamg‘irchiyev Qirg‘izistonda jinoiy ish yuzasidan masalani ijobiy hal etish uchun tadbirkordan pora olganlikda ayblanib, qo‘lga olingan. Qirg‘izistonlik sobiq deputat 2023-yilning fevral oyida O‘zbekistonda qidiruvga berilgan.
Eslatib o‘tamiz, 2023-yilning 5-dekabr kuni Salimboy nomi bilan tanilgan Salim Abduvaliyev O‘zbekiston Jinoyat kodeksining 248-moddasi 1-qismi bilan (o‘qotar qurolni qonunga xilof ravishda saqlash) gumon qilinuvchi tarzda jalb etilib, protsessual tartibda ushlangan.
Izoh (0)