Qirg‘iziston Ichki ishlar vazirligi mamlakatda ommaviy tartibsizliklarni tayyorlash va hokimiyatni zo‘ravonlik bilan egallashga uringan guruhning yetti nafar aʼzosi hibsga olinganini eʼlon qildi.
Ularga nisbatan ommaviy tartibsizliklar uyushtirish aybi bo‘yicha jinoiy ish ochilgan. Joriy yil 17-noyabr kuni Qirg‘izistonda munitsipal kengashlarga saylovlar bo‘lib o‘tishi rejalashtirilgan.
“Bishkek chekkasida boshqa musobaqalar qatori sport o‘yinlari ham o‘tkazilishi rejalashtirilgan edi. Qo‘lga olingan gumonlanuvchilar saylov kuni shu tadbirlarda hokimiyatni zo‘ravonlik bilan egallab olishga chaqirishni, konstitutsiyaga zid talablarni ilgari surishni va vaziyatni beqarorlashtirishni maqsad qilgan”, deyiladi Qirg‘iziston ichki ishlar vazirligi sayti xabarida.
Granata, to‘pponcha, aroq va 1 tonna guruch
Qo‘lga olinganlar orasida Qirg‘iziston fuqarolari ham, xorijliklar ham bor. Tintuvlar chog‘ida ulardan jangovar granata, to‘pponcha, uchta kvadrokopter, shuningdek, 1 ming shisha “olomonni mast qilish uchun aroq”, bir tonna guruch va bir ot topildi.
Qirg‘iziston rasmiylari 2024-yil boshidan beri uchinchi marta hokimiyatni egallashga urinish haqida xabar berishdi. Yanvar oyida Respublika prezidenti Sadir Japarov “ilgari g‘aznadan o‘g‘irlab, soliq to‘lashdan bo‘yin tovlaganlar” tomonidan tayyorlanayotgan davlat to‘ntarishining oldi olingani to‘g‘risida e’lon qilgan edi.
Iyul oyida mamlakat razvedka xizmatlari tartibsizliklar uyushtirish va hokimiyatni egallashni maqsad qilgan bir guruh odamlarning rejalari amalga oshmay qolgani haqida xabar bergandi.
50 million dollarga tushgan “lola inqilobi”
Qirg‘iziston sobiq prezidenti Askar Akayev hokimiyatdan chetlashtirilganidan keyin deyarli 20 yil o‘tsa ham, AQSHni mamlakatdagi davlat to‘ntarishida ayblab kelmoqda. U 80 yoshga to‘lishi arafasida “Rossiyskaya gazeta”ga intervyu berdi. Akayev 2005-yildagi voqealar, ya’ni u oilasi bilan mamlakatdan qochib ketgan paytni esga oldi.
“Mutaxassislar 10 dan 50 million dollargacha bo‘lgan turli miqdorlarni aytadi. Nima bo‘lgan taqdirda ham, ‘lola inqilobi’ AQSHga ancha arzonga tushgan, ammo Qirg‘iziston xalqiga juda qimmatga tushdi: deyarli 15 yillik beqarorlik va tartibsizlik, shuningdek, iqtisodiy turg‘unlik. Bu yillar haqli ravishda ‘yo‘qolgan o‘n yillik’ deb nomlanadi”, dedi u.
Izoh (0)