Qirg‘iziston ikki yarim yil davomida mamlakat qurolli texnikasini yangilashga 125 milliard som (1,422 milliard dollar) yo‘naltirdi. Bu haqda Milliy xavfsizlik davlat qo‘mitasi (MXQ) rahbari Qamchibek Tashiyev hukumat yig‘ilishida ma’lum qildi, deb xabar bermoqda AKIpress.
Tashiyevning qayd etishicha, 2005—2020-yillarda Qirg‘iziston xuddi shu maqsadlar uchun 3-5 milliard som (34-56 million dollar) sarflagan. Taqqoslash uchun, u birgina 2021-yilda mamlakat hukumati qurollarni yangilashga 32 milliard som (364 million dollar), 2022-yilda 53 milliard som (603 million dollar), 2023-yilning olti oyi uchun 40 milliard somdan (455 million dollar) ko‘proq mablag‘ ajratganini sanab o‘tdi.
“Ikki yarim yil davomida 120 milliard somdan ortiq. Bu juda keng ko‘lamli yangilanish”, — dedi Milliy xavfsizlik davlat qo‘mitasi rahbari.
Tashiyevning so‘zlariga ko‘ra, bu pullarga jumladan, Bayraktar, Aksungur, “Akinji” dronlari, “Pechora” zenit-raketa majmuasi, Mi-8, Mi-17 vertolyotlari xarid qilingan.
“Bularni sovg‘a sifatida olganimiz yo‘q, barchasi davlat budjeti mablag‘lari hisobidan sotib olindi”, — dedi Tashiyev.
2023-yilning yanvar oyida Sputnik Qirg‘iziston hukumati davlat amaldorlariga beriladigan mukofot pullarini tejash orqali Turkiya dronlarini sotib olgani haqida xabar bergandi. Turkiyaning Bayraktar TB2 hujumchi droni Qirg‘iziston Milliy xavfsizlik davlat qo‘mitasi chegara xizmatiga birinchi marta 2021-yil dekabr oyida olib kelingan.
2022-yil dekabr oyida Qirg‘iziston prezidenti Sadir Japarov budjetdan sotib olingan Airbus H145 vertolyotini sinovdan o‘tkazgan.
Izoh (0)