Oliy Majlisi Qonunchilik palatasining navbatdagi majlisi deputat Doniyor G‘aniyev qish mavsumida tabiiy gaz bilan taʼminlanmagan hududlarda elektr energiyasi uchun belgilangan ijtimoiy norma miqdorini oshirish masalasini ko‘tardi.
“Joylarda ijtimoiy norma doirasida baʼzi bir eʼtirozlar bo‘lyapti. Eng katta eʼtiroz – ijtimoiy normada tabiiy gaz bilan taʼminlanmagan hududlardagi fuqarolarning ehtiyojlari inobatga olmagan. Chunki biz bilamiz, ko‘p joylarda tabiiy gaz bor, shuning uchun qishda uy isitilganda elektr energiyasi ko‘p isteʼmol qilinmaydi. Baʼzi hududlar bor, afsuski, tabiiy gaz bilan taʼminlanmagan. Ular qish davomida isitishda elektrdan foydalanadi. Bu noto‘g‘ri, lekin ularning boshqa tanlovi yo‘q”, — deydi deputat.
Doniyor G‘aniyev tabiiy gaz bormagan hududlarda o‘tin va ko‘mirdan foydalanish imkoniyati bo‘lmasligini aytdi.
“Shuning uchun elektrdan asosiy isitish vositasi sifatida foydalaniladi. Ularga qish davomida to‘lovlar juda ko‘p bo‘lishini hozirdan hisoblash mumkin. Shuning uchun, hukumatni siz orqali eʼtiborini qaratmoqchi edimki, mana shu qaror doirasida ijtimoiy normani aynan qish davomida uyini isitish uchun tabiiy gaz bilan yoki boshqa bir alternativ metod bilan taʼminlanmagan fuqarolarga kengaytirish, ayni mavsum davomida kattaroq qilish masalasini ko‘rib chiqilsa yuz minglab fuqarolarning og‘iri yengil bo‘lardi”, — degan G‘aniyev.
Bosh vazir o‘rinbosari Jamshid Qo‘chqorov xonadonlarning uchdan bir qismida tabiiy gaz yo‘qligini qayd etib, bu masala ustida ish olib borilishini aytdi.
Izoh (0)