Самарқанд вилоятининг Булунғур ва Тошкент вилоятининг Олмалиқ шаҳрида “свет” ҳамда газдан қарздорликни йўқ қилиб беришни ваъда қилган газчи ва ҳисобчи ушланди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар берди.
Маълум қилинишича, Булунғур туманида тумангаз таъминоти бўлими маҳаллада ишлаш хизмати газчиси С.Х. фуқаро М.Б.нинг хонадонида кўрик давомида табиий газ таъминотидан аниқланган 1,6 млн сўм зарарни 14 млн сўм эканини айтган.
У гўёки ушбу зарар миқдорини камайтириб бериши эвазига М.Б.дан 4,4 млн сўмни олган вақтида ашёвий далиллар билан ушланган.
Шунингдек, Олмалиқ шаҳар ЭТК ҳисобчиси З.А. фуқаро Д.Н.нинг “Дўстлик” МФЙдаги уйининг электр таъминотидан 5 млн сўм қарздорлигини йўқ қилиб бериши эвазига 3 млн сўмни олган вақтида ушланган.
Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.
Қарздорликни йўқ қилиб берувчи “уддабурон”лар
Апрель ойида Тошкент шаҳри, Андижон ва Самарқанд вилоятларида қарздорликни йўқ қилиб бериш учун пул олганлар ушланган эди.
Май ойида ҳам Андижон ва Жиззахда газ ва “свет”дан ноқонуний фойдаланиш ҳолатларини расмийлаштирмасликни ваъда қилган шахслар ушланган.
Шунингдек, июль ойида Самарқандда туман электр таъминоти корхонаси собиқ ходими тадбиркорнинг 14 минг долларини қўлга киритмоқчи бўлгани ҳақида хабар берилганди.
Изоҳ (0)