Ijtimoiy tarmoqlarda Andijon viloyatidagi avtomobillarga metan gaz quyish shoxobchalaridan birida narx oshirilgani haqida xabarlar kuzatildi. Holat yuzasidan viloyat hokimligi munosabat bildirdi.
Qayd etilishicha, ushbu holat tegishli tartibda darhol nazoratga olingan. Metan gaz narxi oshirilmagan va avvalgi narx (3750 so‘m) bo‘yicha avtomobillarga quyilmoqda.
Agarda narx sun’iy oshirilgan holatlarga guvoh bo‘lgan fuqarolardan tegishli idoralarga yoki matbuot xizmatiga (+99893-273-08-23) bu haqda ma’lumot qoldirish so‘raldi.
O‘zbekistonda avtomobillarga gaz to‘ldirish shoxobchalarida metan va propan narxi oshgani haqida xabarlar tarqalgach, Raqobat qo‘mitasi bu borada o‘rganish ishlarini boshladi. Bu holat bo‘yicha e’tirozlar tarqalib, jamoatchilik tomonidan muhokamalarga sabab bo‘ldi. Raqobat qo‘mitasi shuni inobatga olgan holda, o‘z vakolatlari doirasida tovar-xomashyo birjalari orqali realizatsiya qilinishi belgilangan suyultirilgan gaz mahsulotining qo‘yilishi va sotilishi yuzasidan tegishli o‘rganishlar olib borilayotganini ma’lum qildi.
Avtomobillarga gaz to‘ldirish shoxobchalarida bir kub metr metan gaz narxi oshgani haqida xabarlar 1-avgustdan boshlab tarqaldi. Biroq o‘rganishlar barcha hududlarda ham metan narxi o‘zgarmaganini, ayrimlarida eski narxi, ayrimlarida esa 4250 so‘mgacha sotilayotganini ko‘rsatmoqda.
2024-yil 25-may kuni Vazirlar Mahkamasining metan gaz uchun belgilangan eng baland chakana narxning amal qilish muddatini uzaytirish haqidagi qarori qabul qilingan va 1-avgustga qadar avtomobillarga gaz to‘ldirish shoxobchalarida bir kub metr metan gazning eng baland narxi 3750 so‘m etib belgilangan edi.
Moliya vazirligi axborot xizmatining “Daryo”ga ma’lum qilishicha, metan gaz uchun belgilangan eng baland chakana narxning amal qilish muddati uzaytirilmagan, tadbirkorlar metan gaz narxini o‘zlari mustaqil belgilaydi.
Izoh (0)