Raqobat qo‘mitasi tomonidan metan chakana narxlari bo‘yicha o‘tkazilgan monitoring natijasi e’lon qilindi.
Qayd etilishicha, Prezident administratsiyasi huzuridagi Axborot va ommaviy kommunikatsiyalar agentligida bo‘lib o‘tgan brifingda, Raqobat qo‘mitasi raisi o‘rinbosari Farrux Karabayev avtomobillarga gaz to‘ldirish stansiyalarida sotilayotgan metan va suyultirilgan (propan) gaz narxlarini barqarorligini ta’minlash maqsadida qo‘llaniladigan nazorat mexanizmlari yuzasidan ma’lumot berib o‘tdi.
Davlat rahbari tomonidan metan gazi narxlarining asossiz oshirib yuborilishiga yo‘l qo‘ymaslik bo‘yicha Raqobat qo‘mitasi, Bosh prokuratura va Energetika vazirligiga bir qator topshiriqlar berildi. Metan gazi narxlarini barqarorligini ta’minlash maqsadida Raqobat qo‘mitasi tegishli vazirlik va idoralar bilan hamkorlikda avtomobillarga gaz to‘ldirish kompressor shoxobchalarida (AGTKSH) chakana narxlar tizimli monitoringi yo‘lga qo‘yildi.
Jumladan, gaz shoxobchalarida sotilayotgan metan gaz mahsulotining narxlarini tezkorlik bilan aniqlash maqsadida idoralararo elektron axborot almashinuvi tizimi orqali onlayn rejimda hamda bevosita joyiga chiqqan holda har bir metan gaz to‘ldirish shoxobchasi o‘rganiladi va qo‘llanilayotgan narxlar aniqlanadi.
Bundan tashqari, narxlarni asossiz oshirilmasligi yuzasidan har bir gaz to‘ldirish stansiyalarida profilaktika, tushuntirish ishlari olib boriladi va ogohlantirishlar beriladi. Narx cheklovi bekor qilingandan so‘ng Qo‘mita tomonidan respublika bo‘yicha 1450 ta gaz to‘ldirish shoxobchalarida sotilayotgan metan gazi chakana narxlarining dastlabki tezkor monitoringi o‘tkazildi.
Uning natijalariga ko‘ra, gaz to‘ldirish shoxobchalarining 71 foizida (1 064 ta holatda) 3 750 so‘mlik narx saqlanib qolayotgani, 25 foizida (370 ta holatda) narxlar 3800-3950 so‘mgacha bo‘lgani aniqlandi, qolgan 4 foizi ish faoliyatida emasligi aniqlandi.
Qayd etilishicha, bugungi kunda metan gazi narxlarining keskin oshishiga sabab bo‘luvchi omillar mavjud emas. Raqobat qo‘mitasida gaz to‘ldirish shoxobchalari o‘rtasidagi kelishib qilingan harakatlar yoki o‘z ustun muzokara kuchini suiiste’mol qilish natijasida narxlarni asossiz oshirish holatlari aniqlanganda, ushbu xo‘jalik yurituvchi subyektlarga nisbatan narxlarni tushirish bo‘yicha majburiy ko‘rsatmalar beriladi hamda moliyaviy jarimalar qo‘llanilishi mumkin.
Bundan tashqari, propan gazi mahsuloti narxlari o‘rganilganda 20 foiz gaz to‘ldirish shoxobchalarida narxlar 5500 so‘mni, 65 foizida 5500-6000 so‘m oraliqda ekanligi, 5 foizi 6500 so‘m va 10 foizi ish faoliyatida emasligi aniqlandi.
Shu bilan birga, Qo‘mita tomonidan birja savdolarida propan mahsulotining narxlariga ta’sir etuvchi omillar o‘rganilmoqda va ishlab chiqaruvchilar tomonidan narx manipulyatsiyalari va boshqa raqobatga zid harakatlar aniqlanganda ularga nisbatan ta’sirchan huquqiy choralar qo‘llaniladi.
Bugungi kunda, “Raqobat to‘g‘risidagi” qonun hujjatlarida barcha mana shunday qonunga xilof holatlarni oldini olishga qaratilgan mexanizmlar va huquqiy vositalar yetarli darajada belgilangan.
Raqobat qo‘mitasi metan va propan gazi narxlari ustidan ta’sirchan monitoringni davom ettiradi va monitoring natijalari jamoatchilikka doimiy tarzda yetkazib boriladi.
Avtomobillarga gaz to‘ldirish shoxobchalarida bir kub metr metan gaz narxi oshgani haqida xabarlar 1-avgustdan boshlab tarqaldi. Biroq o‘rganishlar barcha hududlarda ham metan narxi o‘zgarmaganini, ayrimlarida eski narxda, ayrimlarida esa 4250 so‘mgacha sotilayotganini ko‘rsatmoqda.
2024-yil 25-may kuni Vazirlar Mahkamasining metan gaz uchun belgilangan eng baland chakana narxning amal qilish muddatini uzaytirish haqidagi qarori qabul qilingan va 1-avgustga qadar avtomobillarga gaz to‘ldirish shoxobchalarida bir kub metr metan gazning eng baland narxi 3750 so‘m etib belgilangan edi.
Moliya vazirligi axborot xizmatining “Daryo”ga ma’lum qilishicha, metan gaz uchun belgilangan eng baland chakana narxning amal qilish muddati uzaytirilmagan, tadbirkorlar metan gaz narxini o‘zlari mustaqil belgilaydi.
Izoh (0)