Ostona shahrida Markaziy Osiyoning eng kuchli bilimdonlarini o‘zida jamlagan “Zakovat” intellektual harakatining Osiyo kubogi bo‘lib o‘tdi. Bu musobaqa qardosh xalqlar o‘rtasida do‘stlik va bilim almashinuvini mustahkamlash uchun ajoyib imkoniyat bo‘ldi. O‘zaro bilimlar bellashuvida O‘zbekiston va Qozog‘iston terma jamoalari ishtirok etdi.
Tadbir ochilishida so‘z olgan O‘zbekiston prezidentining yordamchisi Saida Mirziyoyeva “Zakovat” intellektual o‘yini kabi musobaqalar ikki xalqni yanada jipslashtirishga xizmat qilishini taʼkidladi.
“Bugun O‘zbekiston va Qozog‘iston o‘rtasidagi do‘stona munosabatlar butun dunyoga namunadir! Bizning yo‘lboshchilarimiz eng muhim savollarga javob topa oldilar. Yer yuzida ziddiyatlar kuchaygan bir paytda, Shavkat Mirziyoyev va Qosim-Jo‘mart To‘qayev siyosiy tandemi Markaziy Osiyoni eng xavfsiz, gullab-yashnayotgan do‘stona hududga aylantirishga intilmoqda”, dedi Saida Mirziyoyeva.
Saida Mirziyoyeva O‘zbekiston va Qozog‘iston kuchlarini birlashtirayotgani haqida gapirdi.
“So‘nggi kunlarda qozog‘istonliklar o‘zbek sportchilarining g‘alabasiga qanchalik xursand bo‘layotganini, bizning muxlislarimiz esa sizning chempionlaringizni olqishlayotganini internetda bir ko‘ring. Olimpiadadagi birinchi oltin medallarni qozog‘istonlik Yeldas Smetov va o‘zbekistonlik Diyora Keldiyorova qo‘lga kiritdilar.
Ruxsatingiz bilan shu sahnadan turib, yana bir marta taʼkidlamoqchiman: Diyora, biz sen bilan faxrlanamiz, barakalla!”, deydi Saida Mirziyoyeva.
Izoh (0)