Paralimpiya chempioni Аsila Mirzayorova nogironligi bo‘lgan shaxslar huquqlarini himoya qilish bo‘yicha maxsus vakil sifatida ish boshladi. Bu haqda Ijtimoiy himoya milliy agentligi xabar berdi.
-gutJ09ip.jpg)
22-oktyabr kuni bo‘lib o‘tgan tadbirda para yengil atletika bo‘yicha paralimpiya chempioni Аsila Mirzayorova agentlikning nogironligi bo‘lgan shaxslar huquqlarini himoya qilish bo‘yicha maxsus vakili sifatida tanishtirildi.
“Аgentligimiz oilasiga yana bir paralimpiya chempioni qizimiz kelib qo‘shildi. Biz Аsila bilan Parijda birga ishlashni niyat qilgan edik. Bugun shu niyatimiz amalga oshdi: Аsila Mirzayorova agentlik maxsus vakili bo‘ldi. Аgentlik oilasiga xush kelibsiz, Аsila! Аsila juda kuchli va aqlli qiz. Аsila nogironligi bor shaxslar huquqlarini himoya qilish bilan shug‘ullanadi. Endi bizning jamoamizda Diyora va Аsila kabi chempion qizlarimiz bor. Men ishonaman: biz yanada kuchli bo‘ldik va yangi yuksak marralarni birgalikda zabt etamiz!” dedi Shahnoza Mirziyoyeva.
Tadbirda so‘zga chiqqan paralimpiyada chempioni bildirilayotgan yuksak ishonch uchun o‘z minnatdorchiligini bildirib, agentlik maxsus vakili boʼlishga rozi bo‘lganining sababini quyidagicha izohladi:
“Men uchun nogironligi bo‘lgan shaxslar huquqlarini himoya qilish bo‘yicha maxsus vakil sifatida ish boshlash katta sharaf va masʼuliyat. Bu vazifa menga nogironligi bo‘lgan insonlar huquqlarini himoya qilish va teng imkoniyatlar yaratishga o‘z hissamni qo‘shish imkoniyatini beradi. Paralimpiya sportchisi sifatida men jismoniy va ijtimoiy to‘siqlarni qanday yengishni bilaman va har bir inson jamiyatning teng huquqli aʼzosi bo‘lishi kerak, deb ishonaman”, dedi u.
Аsila Mirzayorova maxsus vakil sifatidagi yangi vazifasida davlat va jamoat tashkilotlari bilan hamkorlik qilib, inklyuziv muhit yaratishda o‘z hissasini qo‘shishidan mamnunligini alohida qayd etdi.
U yengil atletika bo‘yicha Tokio—2020 kumush medali, Parij—2024 oltin medali sohibi hisoblanadi. Shuningdek, Mirzayorova hisobida ikkita jahon chempionligi ham mavjud.
Bundan avval Parij—2024 Olimpiadasi chempioni, dzyudochi Diyora Keldiyorova Ijtimoiy himoya milliy agentligining gender tengsizligi va bolalarga nisbatan zo‘ravonlikka qarshi kurashish bo‘yicha maxsus vakili etib tayinlangandi.
Izoh (0)