Таиланд полицияси мамлакатнинг Панган оролида 15 ноябрь куни ўтказилиши кутилаётган тўлин ой зиёфатида Исроил фуқароларига қарши эҳтимолий теракт ҳақида огоҳлантирди. Бу ҳақда Ynet нашри хабар бермоқда.
Теракт тайёрланаётганидан хабар топган Таиланд ҳуқуқ-тартибот идоралари ходимлари ҳушёрликни ошириб, орол йўлларида тўсиқлар ўрнатган. Ҳозирда, нашрга кўра, Ко-Панганда минглаб исроилликлар мавжуд.
Исроил хавфсизлик манбасига кўра, яҳудий ҳукумати таҳдид ҳақида Таиланд полицияси огоҳлантирилишидан анча олдин хабар топган. Исроил Миллий хавфсизлик кенгаши икки давлат сайёҳлар хавфсизлигини таъминлаш учун биргаликда иш олиб бораётгани ҳақида баёнот берган.
Исроил ҳукумати ўз фуқароларини оммавий тадбирлар ва гавжум жойларга боришдан тийилишга, шунингдек, бошқа одамлар томонидан уларга нисбатан ҳар қандай душманлик кўриниши ҳақида маҳаллий ҳуқуқни муҳофаза қилиш органларига хабар беришга чақирган.
“Тўлин ой зиёфати” исроиллик сайёҳлар орасида машҳур ҳисобланади. Ушбу зиёфат жорий йилнинг 15 ноябрида ўтказилиши кутилмоқда.
Исроил хавфсизлик хизматлари томонидан Ко-Пангандаги 10 мингдан ортиқ исроилликлар учун фавқулодда протокол тез орада эълон қилиниши қайд этилган.
Изоҳ (0)