O‘zbekiston mezbonligida o‘tayotgan futzal bo‘yicha Jahon chempionati guruh bosqichi hal qiluvchi pallaga keldi.
Bugun, 20-sentyabr kuni A hamda B guruhlarida muhim o‘yinlar bo‘lib o‘tadi.
O‘zbekiston futzal milliy jamoasi 2 turdan keyin bir durang va bir mag‘lubiyat qayd etib, 2 turdan so‘ng ham guruhdan chiqish masalasini hal qilmadi. Xo‘sh, O‘zbekistonning guruhdan chiqish imkoniyati qanday? Keyingi bosqichda qaysi jamoa bilan to‘qnash kelishi mumkin?
O‘zbekistonning g‘alabasi nimchorak kafolati!
A guruhining uchinchi turida O‘zbekiston jamoasi Kosta Rika, Paragvay jamoasi esa Niderlandiya bilan o‘ynaydi. Mezbonlar Kosta Rika jamoasini mag‘lub etsa, 4 ochkoga ega bo‘ladi. Guruhdagi o‘rni esa ikkinchi juftlikka bog‘liq bo‘ladi. Agar ushbu o‘yinda Niderlandiya mag‘lub bo‘lsa yoki durang o‘ynasa, O‘zbekiston ikkinchi o‘rin bilan keyingi bosqichga yo‘l oladi.
Niderlandiya esa boshqa guruhdagi vaziyatni kutishga majbur bo‘ladi.
Niderlandlar Paragvay ustidan g‘alaba qozongan taqdirda ham O‘zbekiston o‘z o‘yinida yutsa, 3-o‘rin bilan keyingi bosqichga yo‘l oladi. Chunki teoretik jihatdan B guruhida ikkinchi o‘rinni olishi mumkin bo‘lgan Ukraina yoki Afg‘oniston, C guruhidagi Qozog‘iston yoki Libiya 4 ochko olishi mumkin. 4 ta eng yaxshi natija qayd etgan jamoalar nimchorak finalga yo‘l olishini hisobga oladigan bo‘lsak, O‘zbekistonning har qanday hisobdagi g‘alabasi keyingi bosqich uchun yo‘llanma taqdim etadi.
Durang bo‘lsa ham imkon bor
O‘zbekiston jamoasi durang qayd etsa ham imkoniyat saqlanib qoladi. Ammo bu yerda juda ham ko‘p faktorlarni inobatga olish zarur bo‘ladi.
Agar Paragvay jamoasi Niderlandiya ustidan 4 ta yoki undan ko‘p to‘p farqi bilan g‘alaba qozonsa, O‘zbekiston ikkinchi o‘rin bilan keyingi bosqichga yo‘l olishi mumkin. Uchta to‘p farqi bilan mag‘lub bo‘lsa, keyingi faktorlar inobatga olinadi.
Bunda ikkinchi o‘rin uchun O‘zbekiston durang qayd etganda ham Niderlandiyadan bitta to‘p ko‘proq urishi zarur. Deylik, Niderlandiya 2:5 ga yutqazsa, O‘zbekiston kamida 4 ta gol urishi talab etiladi. Shunda O‘zbekiston urilgan gollar sonidagi ustunlik evaziga 2-o‘rin bilan keyingi bosqichga yo‘l olishi mumkin. Mabodo O‘zbekiston Niderlandiya bilan urilgan gollarda ham tenglikni yuzaga keltirsa, o‘zaro o‘yinga qaraladi: jamoalar durang o‘ynaganini inobatga olsak, bu holatda sariq kartochkalar inobatga olinadi. Niderlandiya jamoasi 2 o‘yinda 2 ta sariq kartochka olgan. Demak, bu borada ustunlik niderlandlarda. O‘zbekiston Paragvay bilan o‘yinda Niderlandiya futbolchilarining kamida 2 marta ogohlantirilishiga umid qilishiga to‘g‘ri keladi. Shu bilan birga o‘zi Kosta Rika bilan o‘yinda ogohlantirmasligi kerak.
Niderlandiyaning g‘alabasi, durang yoki kichik hisobdagi mag‘lubiyati durang qayd etgan o‘zbekistonliklar uchun 2-o‘rindan umid uzish degani. Shunda ham uchinchi o‘rin bilan keyingi bosqichga yo‘l olish mumkin.
Hozirda O‘zbekiston futbolchilari 3 marta, Kosta Rika jamoasi esa 5 marta ogohlantirilgan. Demak, ulardan kamroq olingan sariq kartochka sabab guruhda 3-bo‘lishimiz mumkin.
Shundan so‘ng qolgan o‘yinlar natijasini kutishga to‘g‘ri keladi. Ushbu o‘yinlardan kamida ikkitasida durang qayd etilsa, O‘zbekiston jamoasi 2 ochko bilan ham keyingi bosqichga yo‘l olishi mumkin: Xorvatiya—Kuba, Panama—Tojikiston, Gvatemala—Venesuela.
Kimlar raqib bo‘ladi?
O‘zbekiston milliy jamoasi ikkinchi o‘rinni qo‘lga kiritsa, C guruhida ikkinchi o‘rinni olishi mumkin bo‘lgan Afg‘oniston yoki Ukraina bilan o‘ynaydi.
Uchinchi o‘rinni olsa, B guruhida yetakchisi Braziliya va Tailand jamoalaridan biri yoki C guruhida birinchi o‘rinni olishi mumkin bo‘lgan Argentina bilan nimchorakda to‘qnash keladi.
Xulosa o‘rnida, O‘zbekiston jamoasi uchun eng optimal variant — g‘alaba qozonib, ikkinchi o‘rin bilan keyingi bosqichga yo‘l olish. Uchinchi o‘rin mezbonlar uchun juda ham qiyin raqiblarni taqdim etadi.
Erkin G‘aybullayev tayyorladi.
Izoh (0)