O‘zbekiston superligasining 22-turidan o‘rin olgan bahsda Namanganning “Navbahor” klubi o‘z maydonida Bekobodning “Metallurg” jamoasini qabul qildi.
Raqibning autsayderligi, mehmonlarga ochko suv va havodek zarur bo‘lganligi bois ushbu o‘yinda bekobodliklarning “Navbahor”ga munosib qarshilik ko‘rsatishi kutilgandi. Ammo Sergey Lushan shogirdlari bunga yo‘l qo‘ymadi. Mezbonlardan Odil Hamrobekov, Jamshid Boltaboyev, Abror Ismoilov va Saidazamat Mirsaidovda imkoniyat, biroq ularning zarbalariga aniqlik yetmadi.
Birinchi bo‘lim yakunlanishiga sanoqli daqiqalar kechayotganida “Navbahor” jamoasi aʼzolari maydonda 10 kishi bo‘lib qoldi. Yarim himoyachi Abror Ismoilov raqibiga nisbatan jiddiy tarzda qo‘pollik ishlatgani bois maydondan chetlatildi.
Shunday bo‘lishiga qaramay, mezbonlar 2-bo‘limda ham ustunlikni qo‘ldan boy bermadi. 80-daqiqada “Navbahor” jamoasi standart vaziyatdan so‘ng hisobni ochishga muvaffaq bo‘ldi. Zaxiradan maydonga tushgan Siyavash Haqnazari o‘ng qanotdan jarima zarbasini amalga oshirib, to‘pni bekobodliklar jarima maydonchasi ichiga yetkazib berdi. Jamoaning serbiyalik yarim himoyachisi Yovan Jokich to‘pni boshi bilan darvozaga aniq yo‘lladi — 1:0.
Ushbu hisob o‘yin oxirigacha o‘zgarmadi. Shu tariqa “Navbahor” ochkolari sonini 33 taga yetkazib oldi va sovrinli o‘rinlar uchun imkoniyatni saqlab qolmoqda.
“Daryo” ushbu o‘yindan fotogalereya tayyorladi.
Izoh (0)