Dunyodagi eng mashhur futbolchilardan biri, Saudiya Arabistonining “An-Nassr” klubi va Portugaliya terma jamoasi hujumchisi Krishtianu Ronaldu 40 yoshida sevgilisi Jorjina Rodrigesga turmush qurish taklifini berdi.
Rodriges Instagram’da barmog‘iga taqilgan yirik brilliant uzuk tasvirini joylab, izohda “Ha, birga bo‘lishni istayman. Hozirgi hayotimda ham, keyingisida ham”, deb yozdi va suratda Ronalduni belgiladi.
Zargarlik ustasi Adjay Ananda ta’kidlashicha, uzuk 30 karat atrofidagi D toifali brilliant bilan bezatilgan bo‘lib, uning qiymati taxminan 5 million dollarni tashkil etadi. Boshqa bir mutaxassis Lora Teylor esa markaziy toshning og‘irligi 15–20 karat atrofida bo‘lishi va uzuk narxi 2 million dollardan oshishi mumkinligini aytmoqda.
Ronaldu va Rodriges 2016-yildan beri birga bo‘lib, besh nafar farzandni tarbiyalaydi: Krishtianu kichik, surrogat onadan tug‘ilgan egizaklar Eva va Mateo, hamda ikki qizi — Alana Martina va Bella Esmeralda.
2025-yil 28-yanvarda u X ijtimoiy tarmog‘i sahifasida sevgilisini tug‘ilgan kuni bilan tabriklab, ilk bor uni “rafiqam” deb atagan.
2023-yil yanvaridan beri “An-Nasr” safida to‘p surayotgan Ronaldu Saudiya Arabistoniga oilasi bilan ko‘chib o‘tgan. Mamlakat qonunlariga ko‘ra, erkak va ayol nikohsiz bir uyda yashay olmaydi, biroq afsonaviy futbolchiga istisno tariqasida farzandlari onasi bilan birga yashashga ruxsat berilgan.
Ronaldu futbol tarixida ko‘plab yutuqlarga erishgan sportchidir. U 2016-yilda Portugaliya bilan Yevropa chempioni, UEFA Millatlar Ligasining ikki karra g‘olibi, shuningdek, “Sporting” (Lissabon), “Manchester Yunayted”, “Real Madrid” va “Yuventus” klublarida ham faoliyat yuritgan. 2024-yil iyunida esa u “An-Nassr” bilan shartnomasini 2027-yilgacha uzaytirgan.
Izoh (0)