Sport sohasida joylarda olib borilayotgan islohotlar, Prezident farmoni va qarori ijrosini nazorat qilish maqsadida bugun, 30-iyun sanasida O‘zbekiston Milliy olimpiya qo‘mitasi va Respublika Jismoniy tarbiya va sport vazirligi mutasaddilaridan iborat delegatsiya Qarshi shahrida bo‘lib turibdi, deb xabar beradi MOQ matbuot xizmati.
O‘zbekiston Milliy olimpiya qo‘mitasi va bir vaqtning o‘zida O‘FA 1-vitse-prezidenti bo‘lgan Umid Ahmadjonov boshchiligidagi ishchi guruh bugunning o‘zida “Muruvvat” bolalar uyi, Qarshi shahar olimpiya zaxiralari maktab-internati va “Nasaf” klubi akademiyasidan so‘ngra Viloyat ixtisoslashtirilgan bolalar va o‘smirlar suv sporti turlari Sport maktabida hamda Qarshi shahar bolalar va o‘smirlar sport maktabida bo‘ldi.
Jumladan, ishchi guruh “Nasaf” klubining uy stadioni bo‘lgan “Markaziy” o‘yingohi, “Nasaf” futbol akademiyasi, “Nasaf” futbol klubining mashg‘ulotlar bazasiga tashrifi davomida “Nasaf” klubi rahbariyati bilan uchrashib, hozirgi kunda klubda mavjud muammolarni muhokama qilgan.
“Nasaf” klubi futbolchilari va akademiyada tahsil olayotgan yosh futbolchilarga yaratilayotgan shart-sharoitlar, stadionning ahvoli, mashq maydonlari hamda akademiya binosidagi vaziyatni ko‘zdan kechirib, kamchiliklarni bartaraf etish borasida zarur maslahatlar berilgan.
Umid Ahmadjonov “Nasaf” klubidagi moliyaviy muammolar tez orada bartaraf etilishini, klub oddiy xodimidan tortib rahbariyatgacha barcha oylik maoshlarini to‘liq olishlarini ta’minlashga va’da berib, bu masalani hal qilish uchun oxirigacha borishini aytib o‘tdi. “Nasaf” klubi Qashqadaryo futbolining yuragi ekanini, hamda bu klub ishtirokisiz Superliga o‘yinlarini tasavvur qilib bo‘lmasligini alohida ta’kidlab, Superliga uchrashuvlarini tomosha qilish uchun stadionga tashrif buyuradigan muxlislar uchun barcha qulayliklarni yaratish zarurligini qo‘shimcha qilib o‘tgan.
Shuningdek, ishchi guruh Qarshi shahar bolalar va o‘smirlar sport maktabida tarbiyalanuvchilar uchun yaratilgan sharoitlar, ularning ovqatlanish ratsioni, yotoqxonasi, sport inshootlari, mashg‘ulotlar maydonlari, suv havzalarini ko‘zdan kechirib, olib borilayotgan ishlar bilan yaqindan tanishgan va kamchiliklarni bartaraf etish bo‘yicha tegishli ko‘rsatmalar berib o‘tgan.
Kun oxirida esa delegatsiya viloyat hokimligida Qashqadaryoda sport, xususan, futbol sohasini rivojlantirishda olib borilayotgan ishlar, yo‘l qo‘yilayotgan kamchiliklar bo‘yicha yig‘ilish o‘tkazadi.
Izoh (0)