Mezbonlarning alamli mag‘lubiyati va Yovovich qayd etgan het-trik: “Navbahor”— “So‘g‘diyona” o‘yinidan fotoreportaj

O‘zbekiston superligasining 20-turidan o‘rin olgan bahsda Namanganning “Navbahor” jamoasi o‘z maydonida Jizzaxning “So‘g‘diyona” klubini qabul qildi.

O‘yinning birinchi bo‘limida tashabbus “Navbahor” tomonida bo‘lsa-da, mezbonlar yuzaga kelgan vaziyatlardan foydalana olmadi. Yovan Jokich, Azim Ahmedov va Jamshid Iskanderov yo‘llagan zarbalarga aniqlik yetishmadi.

Natijada jamoalar tanaffusga 0:0 hisobidagi durang bilan chiqib ketdi. Ikkinchi bo‘limni hujumkor ruhda boshlagan Ivan Boshkovich shogirdlari 49-daqiqada hisobni ochishga muvaffaq bo‘ldi: “So‘g‘diyona”ning chernogoriyalik yarim himoyachisi Vladimir Yovovich to‘pni darvozaga aniq yo‘lladi – 0:1.

Oradan 2 daqiqa o‘tar-o‘tmas, Vladimir 20 metrlar chamasi uzoqlikdan aniq va kuchli zarba yo‘llab, hisobdagi farqni oshirdi – 0:2.

Mehmonlar 69-daqiqada hisobni yanada yiriklashtirishga erishdi. Yovovich esa bo‘sh qolgan darvozani aniq nishonga olib, xet-trikka erishdi va yakuniy hisob 0:3 ko‘rinishini olishini ta'minladi.

“Daryo” ushbu o‘yindan fotogalereya tayyorladi.