Norvegiya markaziy bankiga qarashli 2 trillion dollarlik yirik boylik jamg‘armasi Isroil kompaniyalariga kiritgan sarmoyalarini qaytarib oladi. Bu haqda Al Jazeera xabar berdi.
Ma’lum qilinishcha, jamg‘arma Isroildagi barcha shartnomalarni bekor qilgan va 61 ta kompaniyadan 11 tasidagi ulushlarini sotib yuborgan. Bu qaror o‘tgan hafta mamlakatda boshlangan favqulodda tekshiruv ortidan qabul qilingan. Tekshiruv jamg‘armaning yahudiy kompaniyasi “Bet Shemesh Engines”da ulushi borligini aniqlagan edi (kompaniya Isroil qiruvchi samolyotlariga dvigatel yetkazib beradi).
Jamg‘arma rahbari Nikolay Tangen investitsiyalarni bekor qilish tashabbusini G‘azodagi “gumanitar inqiroz” bilan bog‘lamoqda.
“Ulushlarning deyarli hammasini sotib yubordik. Ushbu choralar favqulodda vaziyatlar sababli amalga oshirilmoqda. G‘azodagi vaziyat jiddiy gumanitar inqirozdir. Biz urush holatidagi mamlakatda faoliyat yuritayotgan kompaniyalarga sarmoya kiritayotgan edik. So‘nggi paytlarda G‘arbiy Sohil va G‘azodagi sharoitlar juda og‘ir. Bunga javoban biz tegishli qarorlarni qabul qildik va tekshiruvlarni yanada kuchaytiramiz”, deyiladi jamg‘arma bayonotida.
So‘nggi yillarda Norvegiya hukumati va yirik moliya institutlari Isroil bilan iqtisodiy aloqalarni qisqartirish bo‘yicha bosim ostida qolmoqda. Iyun oyida Norvegiyaning eng yirik pensiya fondi ham Isroil bilan hamkor kompaniyalar bilan aloqani uzgan edi. Bu paytda BMTning falastinlik hududlar bo‘yicha maxsus ma’ruzachisi Francheska Albanese esa mamlakatlarni Isroil bilan barcha savdo va moliyaviy aloqalarni to‘xtatishga, qurol embargosini joriy etishga chaqirmoqda.
Izoh (0)