O‘yinda hisobni ochgan mehmonlar, so‘nggi daqiqalarda mag‘lubiyatdan qutulib qolgan mezbonlar. “Navbahor” — “Bunyodkor” o‘yinidan fotogalereya

O‘zbekiston superligasining 16-turida Namanganning “Navbahor” klubi o‘z maydonida Toshkentning “Bunyodkor” jamoasini qabul qildi.

O‘yinning to‘qqizinchi daqiqasidayoq mehmonlarning ilk hujumi samarali yakunlandi. “Bunyodkor”ning xorvatiyalik legioneri Andriya Filipovich Sanjar Quvvatov bilan yakkama-yakka vaziyatga chiqib, darvozani aniq nishonga oldi va hisobni ochdi — 0:1.

18-daqiqada standart vaziyatdan so‘ng, mezbonlar hisobni tenglashtirdi. Jamshid Iskandarovning burchak zarbasidan so‘ng to‘p darvoza to‘ridan joy oldi — 1:1.

60-daqiqada hakam “Navbahor” darvozasiga 11 metrli jarima zarbasi belgiladi. Penaltini Temurxo‘ja Abduxoliqov aniq amalga oshirib, jamoasini hisobda oldinga olib chiqdi — 1:2.

70-daqiqada “Bunyodkor” futbolchisi Boburbek Yo‘ldoshev maydondan chetlatdi va mehmonlar maydonda 10 kishi bo‘lib qoldi.

Uchrashuvning asosiy vaqtiga to‘xtalishlar uchun 12 daqiqa qo‘shib berildi va 90+8-daqiqada Jamshid Iskandarov penaltini aniq amalga oshirib, hisobni tenglashtirdi — 2:2.

“Daryo” ushbu dramatik tarzda kechgan o‘yindan fotogalereya tayyorladi.