Britaniyalik UFC jangchisi Maykl Peyj 17-avgust kuni AQShning Chikago shahrida bo‘lib o‘tadigan UFC 319 turnirida o‘tkaziladigan o‘rta vazn toifasidagi chempionlik jangi — Drikus dyu Plessi va Hamzat Chimayev to‘qnashuvi haqida o‘z fikrini bildirdi.
Uning fikricha, ushbu bahsda asli Chechinistondan bo‘lgan shvetsiyalik Chimayev favorit, ammo Drikus ham osonlikcha mag‘lub bo‘lmaydi:
Menimcha, Hamzat uni mag‘lub eta oladi. Ammo har safar “endi hech qachon Drikusga qarshi fikr bildirmayman” deb o‘zimga aytaman. Chunki u qandaydir yo‘l bilan doim g‘alaba qozonadi. Uning uslubi menga biroz tartibsizdek tuyuladi, lekin Drikusga munosib baho berish kerak, — dedi Peyj MMAJunkie nashriga bergan intervyusida.
Ma’lumot uchun, 2025-yilning 17-avgust kuni AQShning Chikago shahrida UFC 319 turniri bo‘lib o‘tadi. Kechaning markaziy jangida o‘rta vazn (84 kg) chempioni Drikus dyu Plessi chempionlik kamarini himoya qiladi. Uning raqibi — Hamzat Chimayev.
Chimayev so‘nggi jangini 2024-yil oktyabr oyida UFC 308 turnirida o‘tkazgan bo‘lib, birinchi raunddayoq avstraliyalik sobiq chempion Robert Uittaker ustidan g‘alaba qozongan.
Janubiy afrikalik Drikus dyu Plessi esa so‘nggi jangini 2025-yil fevral oyida UFC 312 turnirida amerikalik sobiq chempion Shon Striklendga qarshi o‘tkazgan va hakamlarning yakdil qarori bilan g‘olib bo‘lgan.
Izoh (0)