O‘zbekiston Superligasining 12-turida Namanganning “Navbahor” klubi o‘z maydonida Navoiyning “Qizilqum” jamoasini qabul qildi.
Oxirgi paytda duranglardan boshi chiqmay qolgan “Navbahor”dan muxlislar shiddatli o‘yin va salmoqli natija kutgan edi, biroq ularning ishonchi bu gal ham oqlanmadi.
69-daqiqada Asadbek Sobirjonovga nisbatan mehmonlar qo‘pollik ishlatdi va hakam “Qizilqum” darvozasiga 11 metrli jarima zarbasi belgiladi. Penaltini “Navbahor”ning gruziyalik hujumchisi Toma Tabatadze amalga oshirdi, ammo uning zarbasidan so‘ng to‘p darvoza to‘siniga tegib, maydon tashqarisiga chiqib ketdi va hisob o‘zgarishsiz qoldi—0:0.
O‘yindan keyingi matbuot anjumanida “Navbahor” bosh murabbiyi Samvel Babayan ishtirok etdi va muxlislardan uzr so‘radi.
“Jamoaga nimadir bo‘lyapti, balki omad yetishmayotgandir. O‘yin sifati bor, harakat qilyapmiz, lekin vaziyatlardan foydalana olmayapmiz, ketma-ket to‘rtinchi durangni qayd etdik. Namanganda 3-yillik faoliyatim davomidagi og‘ir vaziyatga duch kelib turibman. Qimmatbaho ochkolarni boy berayotganimiz achinarli, buning uchun muxlislardan uzr so‘raymiz. Chempionat ayni paytda qizg‘in pallada va vaziyatni o‘nglash uchun hali bizda imkoniyat bor”, — dedi Samvel Babayan.
“Daryo” ushbu o‘yindan fotogalereya tayyorladi.
Izoh (0)