Eron xavfsizlik kuchlari rahbari Bayrutga safarida bedarak yo‘qoldi — OAV

Eron xavfsizlik kuchlari qo‘mondoni Ismoil Qaani Bayrutga safari chog‘ida bedarak yo‘qolgan. Bu haqda Reuters xabar berdi.

Isroil sentyabr oyida Bayrutga zarbalar berib, “Hizbulloh” rahbari Hasan Nasrullohni yo‘q qilganidan so‘ng, Qaani Livanga yo‘l olgan. Biroq o‘tgan hafta oxiridagi hujumlardan beri u boshqa aloqaga chiqmagan. Ma’lumotni Eron xavfsizlik xizmatining ikki nafar yuqori martabali vakili tasdiqlamoqda.

Mansabdorlardan biriga ko‘ra, Qaani 3-oktyabr kuni bombardimon paytida Bayrutning janubiy chekkasida bo‘lgan. Bu hujum “Hizbulloh”ning yuqori martabali vakili Hoshim Safieddinga qaratilgan. Ammo amaldorning ta’kidlashicha, Qaani Safieddin bilan uchrashmagan. Eron va “Hizbulloh” esa shu hujumdan keyin Qaani bilan bog‘lana olmagan.

Ikkinchi amaldorning ta’kidlashicha, Nasrulloh o‘ldirilgandan so‘ng Qaani Livanga jo‘nab ketgan. “Hizbulloh”ning keyingi rahbari Safieddin hujumga uchragandan keyin Eron hukumati u bilan aloqa o‘rnata olmagan. Rasmiy ravishda “Hizbulloh” Safieddin bilan bog‘liq vaziyat yuzasidan hozircha izoh bermadi.