MDH davlatlaridan yana biri Putinni hibsga olishi mumkin 

Armaniston ham Xalqaro jinoiy sud (XJS) tomonidan berilgan order asosida Rossiya prezidenti Vladimir Putinni hibsga olishi kerak bo‘lgan davlatlar qatoriga qo‘shildi. Bu haqda Deutsche Welle xabar berdi.

Armaniston Konstitutsiyaviy sudi  Xalqaro jinoiy sudning (XJS) Rim statutida mustahkamlangan majburiyatlarni mamlakatning asosiy qonunchiligiga muvofiq deb tan oldi. Sud qarori yakuniy hisoblanadi va u e’lon qilingan paytdan boshlab kuchga kiradi. Endi Rim statuti Armaniston parlamenti tomonidan ratifikatsiya qilinishi kerak.

Armaniston hukumati Ozarbayjonni Tog‘li Qorabog‘ bo‘yicha ikki tomonlama mojaro paytida sodir etilgan “jinoyatlar” uchun javobgarlikka tortish maqsadida 2022-yil oxirida Rim statutini tan olish uchun Konstitutsiyaviy sudga murojaat qilgan. Statut 1998-yilda imzolangan, ammo Armaniston hozirgacha uni ratifikatsiya qilmagan, chunki 2004-yilda Konstitutsiyaviy sud shartnoma majburiyatlarini o‘sha paytda amalda bo‘lgan mamlakat konstitutsiyasining bir qator qoidalariga zid deb tan olgan.

Putin Armanistonga tashrif buyursa, hibsga olinishi mumkin

Armaniston Konstitutsiyaviy sudining qarori Xalqaro jinoiy sudning (XJS) tergov palatasi Putinni, shuningdek, Rossiyadagi bolalar huquqlari bo‘yicha komissar Mariya Lvova-Belovani hibsga olishga order berganidan bir hafta o‘tib ma’lum bo‘ldi. Ular harbiy jinoyatlarda, xususan, Ukrainaning bosib olingan hududlaridan bolalarni Rossiyaga majburan deportatsiya qilishda gumon qilinmoqda.

Moskva 2022-yil 24-fevralda Rossiya harbiylarining Ukrainaga hujumi ortidan Ukrainada sodir etilgan harbiy jinoyatlarga aloqadorligini rad etadi. Rossiya XJSning yurisdiksiyasini tan olmaydi va uning ishida ishtirok etmaydi. 2016-yildan beri u sudning harakatlarini belgilaydigan Rim statutining ishtirokchisi emas.

O‘z navbatida, XJS harbiy jinoyatlarni tergov qilish va jazolashda davlat rahbarlarining daxlsizligini tan olmaydi. Putin XJS orderiga asosan Rim statutini ratifikatsiya qilgan 123 ta mamlakatlarga endi kira olmaydi, ular orasida Tojikiston ham bor.