Shavkat Mirziyoyev Mustaqil Davlatlar Hamdo‘stligi davlat rahbarlari kengashining majlisida ishtirok etdi, deb xabar bermoqda prezident matbuot xizmati.
Qozog‘iston prezidenti Qasim-Jomart Toqayev raisligida o‘tayotgan sammit ishida Ozarbayjon prezidenti Ilhom Aliyev, Armaniston bosh vaziri Nikol Pashinyan, Belarus prezidenti Aleksandr Lukashenko, Qirg‘iziston prezidenti Sadir Japarov, Rossiya prezidenti Vladimir Putin, Tojikiston prezidenti Emomali Rahmon, Turkmaniston prezidenti Serdar Berdimuhamedov hamda MDH Ijroiya qo‘mitasi raisi – Ijrochi kotibi Sergey Lebedev qatnashdi.
Kun tartibiga muvofiq delegatsiyalar rahbarlari tashkilot doirasidagi ko‘p tomonlama hamkorlikni rivojlantirish va bu borada erishilgan natijalar yuzasidan fikr almashdi, siyosiy, savdo-iqtisodiy va madaniy-gumanitar sohalardagi aloqalarni yanada kengaytirish masalalarini ko‘rib chiqdi. Shavkat Mirziyoyev o‘z nutqida MDH doirasidagi sheriklikni mustahkamlashning muhim yo‘nalishlari yuzasidan o‘z nuqtai-nazarini bayon qildi.
O‘zbekiston prezidenti narx-navoning sun’iy o‘sishiga yo‘l qo‘ymaslik hamda inflyatsiyani jilovlash maqsadida MDH makonida oziq-ovqat mahsulotlari to‘siqlarsiz yetkazib berilishi uchun qulay shart-sharoitlar yaratish muhimligini qayd etdi.
Mamlakatlarning transport tizimiga bo‘lgan jiddiy tahdidlarni inobatga olgan holda, yangi logistika yo‘laklarini hamkorlikda rivojlantirish g‘oyat muhim. Bu o‘rinda gap “Termiz – Mozori-Sharif – Kobul – Peshovar” hamda “Xitoy – Qirg‘iziston – O‘zbekiston” temir yo‘llarini qurish loyihalari haqida bormoqda. Ular MDHni transqit’aviy transport tashishlarning muhim zanjiriga aylantirishga ko‘maklashadi.
O‘zaro innovatsion hamkorlik va yoshlar masalasida munosabatlarni kengaytirish maqsadida Shavkat Mirziyoyev 2023-yilda O‘zbekistonda MDH mamlakatlari yosh olimlarining “Yoshlar innovatsiya tarafdori” shiori ostidagi birinchi kongressini o‘tkazishni taklif qildi.
2023-yilda Sankt-Peterburg shahrini MDHning madaniyat poytaxti deb e’lon qilinishi to‘g‘risidagi qaror ko‘llab-quvvatlandi. 2024-yilda madaniyat poytaxti nomini olishga Samarqand nomzodi ilgari surildi.
Bundan tashqari, O‘zbekiston yetakchisi har yili shaxmat bo‘yicha Hamdo‘stlik ochiq kubogini o‘tkazishni taklif qildi.
So‘zining yakunida Shavkat Mirziyoyev MDH Ijroiya qo‘mitasi raisi – Ijrochi kotibi Sergey Lebedevning vakolatlari navbatdagi muddatga uzaytirilishini ma’qulladi hamda Qirg‘iziston prezidenti Sadir Japarovga 2023-yilda tashkilotga raislik faoliyatida muvaffaqiyatlar tiladi.
Sammit natijalari bo‘yicha ko‘p tomonlama hamkorlikning turli sohalariga oid qator muhim hujjatlar qabul qilindi.
Izoh (0)