Flightradar24 servisi ma’lumotlariga ko‘ra, 11-iyul kuni NATO sammiti boshlanadigan Vilnyusga Amerikaning “Qiyomat kuni” deb nomlanuvchi Boeing 747-E4B samolyoti qo‘ndi. Samolyot bir kun avval Merilend shtatidagi Kemp-Springs shahridan (u yerda Amerikaning Endryu aviabazasi joylashgan) havoga ko‘tarilib, seshanba kuni ertalab Litva poytaxtiga qo‘ndi. Layner to‘qqiz soatdan ko‘proq parvoz qildi.
Boeing E-4B Nightwatch samolyoti shuningdek, AQSH Havo kuchlari havo qo‘mondonligi posti (Advanced Airborne Command Post — AACP) sifatida mashhur. Layner Boeing 747-200 ning o‘zgartirilgan versiyasidir. 1970-yillardan beri AQSHda jami to‘rtta shunday samolyot ishlab chiqarilgan, deb ta’kidlaydi Business Insider.
Samolyot Amerika qo‘mondonligiga strategik va nostrategik qurollar, xususan, yadro arsenali bilan bog‘lanish imkonini beradi. Buning yordamida bortdagi boshqarish tizimi orqali yerdagi ballistik raketalarni uchirish mumkin.
Uch qavatli E-4B Nightwatch 112 kishini sig‘dira oladi. O‘rta paluba “qo‘mondonlik markazi” bo‘lib, undan prezident va boshqa yuqori martabali amaldorlar yadro qurolidan foydalanish ehtimoli yuzaga kelgan taqdirda, AQSH harakatlarini muvofiqlashtirish uchun o‘tirishi mumkin, deb yozdi Newsweek. Bu yerda qo‘mondonlik zonasi, konferensiya zali, brifing zali, aloqa zonasi va dam olish maskani mavjud.
Samolyot to‘rtta dvigatelga ega, unga havoda turib yonilg‘i quyish mumkin, layner parvozda bir necha kun (yonilg‘i quymasdan — 12 soat) turishga qodir. BI ma’lumotlariga ko‘ra, E-4B parvozi soatiga qariyb 160 000 dollarga tushadi.
AQSH prezidenti Jo Bayden 10-iyul kuni kechqurun Vilnyusga Air Force One samolyotida keldi. Bungacha Amerika rahbari Buyuk Britaniyaga tashrif buyurgan va u yerda qirol Charlz III bilan uchrashgan. 12-iyulgacha davom etadigan NATO sammiti doirasida Bayden Ukraina prezidenti Vladimir Zelenskiy bilan muzokara o‘tkazishi kutilmoqda.
Izoh (0)