“Samimiy mehmondo‘stlik uchun minnatdorman” — Durov O‘zbekistonga tashrifi haqida

Telegram tarmog‘i asoschisi Pavel Durov O‘zbekistonga tashrifi haqidagi taassurotlarini muxlislari bilan bo‘lishdi. Durovning fikrlari va safar davomida olgan suratlari Du Roveʼs Channel Telegram kanaliga joylangan.

Pavel Durov O‘zbekiston aholisining qariyb uchdan ikki qismi Telegramʼdan foydalanishini maʼlum qilgan. Ayni paytda bu tarmoq butun boshli iqtisodiyot tizimlarining bir qismiga aylanib ulgurganini aytib, mamnuniyat bildirgan.

O‘z xabarida Durov O‘zbekistondagi sayohat yo‘nalishi haqida ham qisqacha maʼlumot keltiradi. Mamlakat sharqidagi tog‘li hududlar hamda tarixiy shaharlarga tashriflar nihoyatda hayratlanarli bo‘lgani aytiladi.

“O‘zbekistonga safarim chog‘ida tez rivojlanayotgan Toshkentning zamonaviy infratuzilmasi, Sharqiy O‘zbekistonning tog‘li landshaftlari, Buxoro va Samarqandning boy tarixi meni hayratda qoldirdi,” — deya o‘z hayratini izhor qilgan Durov.

Ijtimoiy tarmoq magnati o‘z xotiralarida O‘zbekistonning samimiy insonlari bilan ko‘rishganini, iliq kutib olinganini keltirgan. O‘zbekiston poytaxtiga yil yakuniga qadar yana bir bor kelishi mumkinligiga ishora qilgan.

“Men juda ko‘p yosh va iqtidorli, qalbi qaynoq insonlarni uchratdim. Men samimiy qabul qilganlaridan mamnunman va yil oxirida quyoshli Toshkentga kelib ko‘proq vaqt o‘tkazishga umid qilaman”, — deb fikrlarini yakunlagan Durov.

Iyun boshlarida Telegram asoschisi Pavel Durov yozni Markaziy Osiyoda o‘tkazishini e’lon qilgandi.

Keyinroq Telegram asoschisi Pavel Durov Qirg‘izistonga tashrifi aks etgan suratlar va safar taassurotlarini o‘z muxlislari bilan bo‘lishgandi.

So‘nggi 4 oyda ushbu ijtimoiy tarmoqning Qirg‘izistonda mashhurligi 30 foizga oshgan.

O‘z izohlarida Pavel Durov mamlakatga yana qaytishi mumkinligiga ishora qilgan. Markaziy Osiyo bo‘ylab safari davom etishini bildirgan.