Meksika prezidenti Andres Manuel Lopes Obrador, agar Vladimir Putin oktyabr oyida Meksikaning navbatdagi prezidenti Klaudiya Sheynbaumning inauguratsiyasida ishtirok etsa, rasmiylar uni hibsga olmasligini maʼlum qildi.
Putinni hibsga olish uchun order Meksika aʼzo bo‘lgan Xalqaro jinoiy sud (XJS) tomonidan berilgan edi.
Obrador inauguratsiya taklifnomalari Meksika bilan diplomatik aloqalarga ega bo‘lgan barcha davlatlar rahbarlariga yuborilganini ta’kidlagan. Undan mazkur tadbirga Rossiya prezidenti tashrif buyurgan taqdirda XJS buyrug‘i asosida uning hibsga olinish ehtimoli so‘ralgan.
“Biz buni qila olmaymiz, bu bizning ishimiz emas”, deb javob bergan Meksika prezidenti matbuot anjumanida.
Obradorga ko‘ra, Meksika Rossiya va Ukrainaga kelishuvga erishishni taklif qilgan.
“Biz urushga qarshimiz, biz tinchlik tarafdorimiz. O‘z vaqtida men Hindiston bosh vaziri Modi, Rim papasi va BMT bosh kotibiga urushni to‘xtatish uchun aloqa o‘rnatib, kelishuv izlashga chaqirishni taklif qilgandim”, deya qo‘shimcha qilgan u.
XJS 2023-yilning 17-mart kuni Putinni hibsga olishga order bergan edi. Sudga ko‘ra, Rossiya prezidenti Ukrainadan “aholi (bolalar)ni noqonuniy ravishda deportatsiya qilish bilan bog‘liq urush jinoyatlari” uchun javobgar bo‘lishi mumkin. Rossiya prezidenti bu yil XJS aʼzosi bo‘lgan Braziliya raisligida bo‘lib o‘tadigan “Katta yigirmatalik”ning noyabrdagi sammitiga ham taklif qilingan. Braziliya prezidenti Lula da Silvaning aytishicha, Vladimir Putin tashrifi oqibatlarini o‘zi baholashi kerak.
Izoh (0)