Saudiya Arabistoni valiahd shahzodasi Muhammad bin Salmon Ol Saudning ogohlantirishicha, agar Jo Bayden ma’muriyati qirollikni neft narxi chegarasini belgilash siyosati uchun jazolamoqchi bo‘lsa, AQSHni dahshatli iqtisodiy oqibatlar kutadi. Bu haqda Washington Post nashri xabar bermoqda.

2022-yil oktabr oyida AQSH prezidenti Jo Bayden Saudiya Arabistoni OPEK+ tashkilotiga aʼzo davlatlarning kunlik neft qazib olishni ikki million barrelga qisqartirish bo‘yicha kelishuvi shartlarini qabul qilganidan noroziligini bildirgandi.

“Ular (Ar-Riyod) Rossiya bilan amalga oshirgan ishlarning oqibatlari bo‘ladi”, — degan Bayden CNN telekanaliga bergan intervyusida va buning uchun Kongress bilan hamkorlikda chora ko‘rishini qo‘shimcha qilgan. O‘shanda New York Times jurnalistlari Saudiya Arabistoni AQSH bilan neft qazishni ko‘paytirish bo‘yicha maxfiy kelishuvlarni buzganini aytdi.

WP nashriga ko‘ra, AQSH prezidentining ommaviy tahdidlaridan so‘ng, Saudiya shahzodasi agar Vashington haqiqatan ham javob choralarini qo‘llasa, bu “yirik iqtisodiy oqibatlar” keltirishi bilan tahdid qilgan hamda “AQSH ma’muriyati bilan endi muomala qilib o‘tirmasligini” aytgan.

Oq uy Saudiya Arabistonidan bunday tahdidlar bo‘lgani haqida eshitmaganini aytdi. Rasmiylarning aytishicha, OAVga oshkor bo‘lgan hujjatlarning “tarixi uzun, ular hozirgi vaziyat haqida to‘liq tasavvur bera olmaydi”.