Qashqadaryo viloyatining Yakkabog‘ tumanida tadbirkorga tegishli savdo do‘konini noqonuniy tarzda buldozerda buzishga uringanida yoqib yuborilgan sobiq hokim o‘rinbosari Mansur Tuymayev va tuman “Yermulkkadastr” DUK rahbari (ayni kunda Kadastrlar palatasining Chiroqchi tuman filiali rahbari — tahr.) tumandagi 56 gektar sug‘oriladigan yer maydonini uy-joy qurish uchun fuqarolarga berib yuborgani ma’lum bo‘ldi. Bu haqda sud hujjatlari bilan tanishgan “Daryo” muxbiri xabar berdi.
“Mas’ullar ya’ni sobiq hokim o‘rinbosari Mansur Tuymayev hamda ‘Yermulkkadastr’ DUK sobiq rahbari Zafar Safarov lavozimda o‘tirgan paytda 56,69 gektar yer maydonini auksion savdolarisiz to‘g‘ridan to‘g‘ri ajratib berib, noqonuniy qarorlar imzolagan. Ular ushbu harakatlari bilan yerlar auksion savdolarida o‘ynalganida savdolarning boshlang‘ich to‘lovi sifatida byudjetga tushishi lozim bo‘lgan 1 milliard 376 million 949 ming so‘mlik mablag‘ning to‘lanmay qolishiga sababchi bo‘lgan”, deydi bu haqda “Daryo” muxbiriga axborot bergan manba.
Sud hujjatidan anglashilishicha, ushbu jinoyat ishi 2023-yilning 12-sentyabr kuni Jinoyat ishlari bo‘yicha Shahrisabz shahar sudida ko‘rib chiqilib, Tuymayevga 4 yil-u 2 oy muddatga ozodlikni cheklash jazosi tayinlanib, ikkovlondan davlat foydasiga solidar tartibda 1 milliard 376 million 949 ming so‘mlik zarar undirilishi belgilangan. Ayni kunda Kadastrlar palatasining Chiroqchi tuman filiali rahbari sifatida ishlab kelayotgan Zafar Safarovga esa javobgarlikka tortish muddati o‘tib ketgani uchun aybdor deb topilsa-da, jazo tayinlanmagan. Holbuki, u ayni paytda ham mansabdor sifatida faoliyat yuritmoqda.
“Eng qizig‘i Tuymayev va Safarov Qashqadaryo viloyat sudining Jinoyat ishlari bo‘yicha sudlov hay’ati apellyatsiya instansiyasiga shikoyat kiritgan. Apellyatsiya instansiyasining 2024-yil 4-apreldagi ajrimi bilan Tuymayev ham xuddi Safarov singari javobgarlikka tortish muddati o‘tib ketgan degan vaj bilan javobgarlikdan ozod qilingan. Shuningdek, davlatga yetkazilgan 1 milliard 376 million 949 ming so‘mlik zararni qoplash ham faqatgina Safarovning zimmasida qoldirilgan. Safarovning esa 1 milliard 376 million 949 ming so‘mlik zararni qoplagan yoki qoplamagani noma’lum”, deydi manba.
Izoh (0)