Qashqadaryo viloyatining Mirishkor tumanida hamkasblari bilan dam olishga chiqqan profilaktika inspektori dom-daraksiz yo‘qolgani xabar berilgandi. “Daryo” manbasining xabar berishicha, kecha, 4-avgust kuni qidiruvning oltinchi kunida inspektorning jasadi topilgan.
Mazkur xabarni viloyat Favqulodda vaziyatlar boshqarmasi axborot xizmati Sohib Vaitov ham tasdiqladi.
“Qidiruvning oltinchi kunida qutqaruvchilar Sechanko‘ldan inspektorning jasadini olib chiqishdi”, — deydi Sohib Vaitov.
Marhumning qishloqdoshlariga ko‘ra, janoza marosimi bugun profilaktika inspektori tug‘ilgan qishloq — Kasbi tuman Novqat qishlog‘idagi xonadonida bo‘lib o‘tadi.
“Daryo” jurnalisti bilan suhbatlashgan Mirishkor tumani hokimligi axborot xizmati rahbari Azizbek Yazdurdiyev profilaktika inspektori o‘tgan yakshanba, 30-iyul kuni Sechanko‘lga hamkasblari bilan dam olishga borganini maʼlum qilgandi.
“Holat joriy yilning 30-iyulida sodir bo‘lgan. ‘Barhayot’ MFY profilaktika inspektori J.E. yakshanba, dam olish kuni, ishdan tashqari vaqtda sheriklari bilan Pomuq hududida joylashgan Sechanko‘lga dam olish maqsadida borgani aytildi. Mirishkor tumani IIB va FVB tomonidan qidiruv ishlari tashkil etilgan bo‘lib, Favqulodda vaziyatlar boshqarmasi va tuman bo‘limining 15 nafar xodimi, maxsus texnika va g‘avvoslari, IIB xodimlari qidiruv ishlariga jalb etilgan”, — degandi masʼul.
Suhbatdoshga ko‘ra, kapitan J.E.ning uch nafar farzandi bor.
Izoh (0)