Botir Qodirovning Zohirshoh Jo‘rayev bilan sudlashayotgani so‘nggi kunlarda ko‘plab muhokamalarga sabab bo‘lmoqda. Xonanda “Daryo” muxbiri bilan suhbatda ilk marotaba O‘zbekiston xalq artisti Sherali Jo‘rayev uning otasi ekanligi hamda Shohjahon va Zohirshoh Jo‘rayevlarni sudga berishiga nima sabab bo‘lgani haqida so‘zlab berdi.
— Bir kun ichida xalq orasida juda ko‘p fikrlar yuribdi. Shu fikrlarga aniq, to‘g‘ri, shaffof javob berishga qaror qildim. Sherali Jo‘rayev — mening otam, otam bo‘lgan va bundan keyin ham otam bo‘ladi. Bu narsani xalqimiz, butun Andijon biladi. Andijondan borib so‘rasangiz, hamma andijonliklar gapiradi bu haqda. Bu yashiradigan narsa emas edi. Lekin bunga sabab bo‘lgani uchun buni yashirib kelganman. Otam bilan 20 yoshimgacha juda yaxshi munosabatda bo‘lganman. Otam mendan xabar olganlar. Men o‘sha ota eshigida katta bo‘lganman. Yozgi ta’tillarni otamning ota hovlisida, bobom va buvim bilan o‘tkazganman. Besh yoshimgacha — otam va onam ajrashgunlaricha biz birga yashaganmiz. Otam onamni yaxshi ko‘rib qolib, nikohdan o‘tishganidan keyin men dunyoga kelganman. Nikohli farzandman, benikoh farzand emasman. Shunga aniqlik kiritib qo‘yishim kerak. Bu borada ham turli gap-so‘zlar bo‘lyapti. Buni otamning atrofidagi yaqinlari, ularning nikohiga guvoh bo‘lganlar buni juda yaxshi bilishadi. 20 yoshimgacha otam bilan yaxshi munosabatda edik, ular menga moddiy yordam berib turardilar. Andijonga kelganlarida doim ko‘rishardik. Otam menga “Bolam, hayotda ba‘zi narsalar bo‘ladi. Sen bunga sabr qilishing, tushunishing kerak bo‘ladi”, deganlari uchun 43 yil bu mavzuni ochmadim. Ya’ni otamning so‘zlarini ikki qilgim kelmadi, — deydi Botir Qodirov.
Shuningdek, Botir Qodirov internet foydalanuvchilaridan otasi haqida turli xunuk so‘zlarni yozmasliklarini so‘radi.
— Men muxlislardan iltimos qilaman. Otamning sha’niga nisbatan turli xunuk so‘zlarni aytishni to‘xtating. Chunki otamni bolaligimdan yaxshi ko‘rganman va bundan keyin ham yaxshi ko‘raman. Ularni muhokama qilish menga emas. Bu oilaviy masala bo‘lgani uchun ukalarim bilan kelishib olamiz, degan umiddaman. Bu narsani qilmasdan, sudga bermasdan yurishim ham mumkin edi. Lekin ukam Shohjahon sentyabr oyida Instagram sahifasiga “Sen kimdan dunyoga kelganingni bilmaydigan, o‘zingdan ham shubhalanadigan, kimni farzandi ekanligingni bilmaydigan” degan ma’nodagi posti onamning sha’ni, shaxsiyatiga teggani uchun sudga berishga qaror qildim. Onam uchun bu ishga kirishdim. O‘tib ketgan onamning sha’niga nomaqbul gaplar bo‘lgani, o‘zimning sha’nimga, qadr-qimmatimga to‘g‘ri kelmaydigan gaplar bo‘lgani uchun chidab tura olmadim. Shundan keyin ularga qonunan isbotlab berishga kirishdim. Lekin men birovning otasini tortib olganim yo‘q, yoki birovning otasini otam degan joyim yo‘q. Vaholanki, mening otamni ular mendan tortib olishgan. Men ulardan oldin dunyoga kelganman. Otam va onam o‘rtasidagi munosabatlarni ular o‘zlari biladi. Biz farzandlar ota-onamizning munosabatlarini muhokama qilishga haqli emasmiz, — deydi Botir Qodirov.
Botir Qodirov bilan to‘liq intervyuni quyida tomosha qilishingiz mumkin.
Izoh (0)