Polsha markazidagi Otvosk shahrida joylashgan boshlang‘ich maktab hududidan Ikkinchi jahon urushi davrida portlamay qolgan bomba topildi. Binodagi barcha odamlar shu zahoti evakuatsiya qilingan.
Bu haqda “TASS” agentligi xabar berdi.
Unga ko‘ra, bomba mahalliy vaqt bilan soat 11:00 atrofida maktabdagi yer uchastkasida ishlayotgan ishchilar tomonidan topilgan.
“O‘sha vaqtda maktab binosida 355 nafar o‘quvchi va xodimlar bo‘lgan. Ularning barchasi evakuatsiya qilinib, voqea joyiga sapyorlar yetib kelgan”, dedi mahalliy politsiya matbuot kotibi Patrik Domaretskiy.
Avvalroq Germaniyaning Kyoln shahrida Ikkinchi jahon urushidan qolgan bomba topilgani tufayli 7 mingga yaqin odam evakuatsiya qilingani xabar berilgandi.
Taxminiy hisob-kitoblarga ko‘ra, Ikkinchi jahon urushi oxirida Germaniyaga 2 milliondan ortiq turli kalibrli bombalar tashlangan, ularning 10-20 foizi portlamagan.
Izoh (0)