O‘zini o‘zi respublika deb e’lon qilgan Lugansk Xalq Respublikasidagi Rubejnoye shahriga Rossiya samolyotidan aviabomba tushib ketdi. LXRning Rossiya tomonidan tayinlangan rahbari Leonid Pasechnik ta’kidlashicha, “FAB-250” o‘q-dorilarining “favqulodda qulashi” Rossiya Aerokosmik kuchlari samolyoti jangovar topshiriqlarni bajarayotgan vaqtda sodir bo‘lgan.
Hech kim jabrlanmadi, dedi Pasechnik. Yaqin atrofdagi uylar aholisi evakuatsiya qilingan. Vaqtinchalik joylashtirish punktida besh kishi, jumladan, ikki bola bor.
Bomba qulagan joyda Ichki ishlar, Favqulodda vaziyatlar vazirliklari va harbiy komendatura vakillari ishlamoqda. Mutaxassislar o‘q-dorilarni zararsizlantirish to‘g‘risida qaror qabul qilmoqda.
Rossiya Mudofaa vazirligi Rubejnoyega aviabomba tashlab yuborilishi haqida izoh bermadi.
Bu yanvar oyi boshidan beri Rossiya nazorati ostidagi hududlarga rus samolyotlaridan o‘q-dorilar tushib ketishi bilan bog‘liq ikkinchi holat. 2-yanvar kuni ertalab Voronej viloyatining Petropavlovka qishlog‘ida Rossiya Aerokosmik kuchlari samolyotidan aviatsiya o‘q-dorilari tushib ketdi. 100 dan ortiq uy zarar ko‘rgan, to‘rt kishi jarohatlangan.
Izoh (0)