Amerika Qo'shma Shtatlari oltinchi avlod B-21 Raider strategik yashirin bombardimonchi samolyotining muntazam sinov parvozlarini boshladi.
Bu haqda Northrop Grumman korporatsiyasi aviatsiya tizimlari departamenti rahbari Tomas Jons ma’lum qildi.
“Biz haqiqatan ham sur’atni oshirib boryapmiz va haftada ikkita sinov parvozini amalga oshirmoqdamiz”, dedi Jons Amerika havo kuchlari assotsiatsiyasi konferensiyasida.
Uning so‘zlariga ko‘ra, yaqin kelajakda har kuni sinov parvozlari amalga oshiriladi.
Avvalroq AQSH Harbiy-havo kuchlari global zarba berish qo‘mondonligi strategik bombardimonchi samolyot allaqachon kam hajmda ishlab chiqarilayotgani haqida xabar bergan edi.
B-21 Raiderni ishlab chiqarish dasturi doirasida AQSH Harbiy-havo kuchlari 2030-yillar boshiga qadar ushbu samolyotlardan kamida 40 tasiga ega bo‘ladi. Northrop Grumman korporatsiyasi allaqachon ushbu turdagi kamida o'nta samolyotni tayyor qilib bo‘lgan.
2022-yil dekabr oyining boshida Pentagon birinchi marta yangi strategik yashirin bombardimonchi B-21 Raiderni rasman taqdim etgandi.
B-21 Raider qanday xususiyatlarga ega?
Dastlabki ma’lumotlarga ko‘ra, ilg'or texnologiyalar asosida yaratilgan B-21 Raider bombardimon samolyoti avvalgi avlod samolyotlariga qaraganda ko‘proq yukni ko‘tara oladi.
Shuningdek, uni radarlarda aniqlash qiyin bo‘ladi. B-21 Raider oddiy o'q-dorilarni ham, termoyadro qurollarini ham olib yurishga qodir bo'ladi. Ishlab chiqish jarayonida bombardimonchi samolyotning parvozi davomiyligiga alohida e'tibor berildi, ammo to‘liq xususiyatlari maxfiy saqlanmoqda.
Izoh (0)