Mask Ukrainadagi urush tufayli AQSH zaxiralarini ahmoqona tarzda kamaytirdi, degan fikrga qo‘shilishini ma’lum qildi

Milliarder Ilon Mask Ukrainadagi urush tufayli AQSH o‘zining barcha qurol-yarog‘ zaxiralarini ahmoqona tarzda kamaytirdi, degan fikrga qo‘shilishini ma’lum qildi.

Avvalroq bunday fikrni boshqa bir milliarder Devid Saks X ijtimoiy tarmoqdagi sahifasida yozib qoldirgandi.

Neokonservatorlar go‘yo Amerikaning kuchi cheksizdek harakat qilmoqda. Ular o‘zaro kelishuvga erishish va ustuvorliklarni belgilashdan bosh tortyapti. Natijada, Amerika Ukrainadagi osonlikcha oldini olish mumkin bo‘lgan proksi-urushda o‘z zaxiralarini ahmoqona tarzda tugatmoqda, — deb yozadi Saks.

Ilgari Mask AQSHning Ukrainaga yordami urushning borishiga ta’sir ko‘rsatmay, faqat mamlakat yoshlarini qurbon qilishga sabab bo‘layotganini aytgan edi.

Bloomberg agentligi AQSH Kongressiga yuborilgan Pentagon hujjatiga tayanib, AQSH Mudofaa vazirligi Ukrainaga yordam ko‘rsatganidan so‘ng ustuvor vazifa sifatida o‘zining qurol-yarog‘ zaxirasini 6,5 milliard dollarga to‘ldirishi kerakligini xabar qilgandi.