Rossiya prezidenti Vladimir Putin o‘z hukumatiga uran, titan va nikel eksportiga cheklovlar tayyorlashni topshirdi. Bu haqda “Interfaks” xabar berdi.
Uning so‘zlariga ko‘ra, qaror G‘arb sanksiyalari va cheklovlariga javob bo‘ladi. Rossiya iqtisodiyoti dunyoda talabgir rangli metallarni eksport qilish imkoniyatini qo‘ldan boy berishi mumkin.
Bizga bir qator tovarlarning yetkazib berilishi cheklanmoqda, lekin biz ham ma’lum cheklovlar — uran, titan, nikel kabi mahsulotlar haqida o‘ylab ko‘rishimiz mumkin. Umuman olganda, agar bu bizga zarar keltirmasa, o‘ylash mumkin — men buni ertaga qilish kerak deyayotganim yo‘q — tashqi bozorga nafaqat men sanab o‘tgan tovarlarni, balki boshqa ayrim mahsulotlarni ham yetkazib berish bo‘yicha ma’lum cheklovlar haqida o‘ylab ko‘rish mumkin”, dedi Putin.
Uran
Jahon uran bozorida Rossiya atom elektr stansiyalari uchun eng yirik yoqilg‘i yetkazib beruvchisi hisoblanadi. May oyida AQSH prezidenti Jo Bayden Senat tomonidan ma’qullangan Rossiyadan boyitilgan uran importini taqiqlash to‘g‘risidagi qonunni imzoladi.
Nikel
Rossiya nikellari allaqachon AQSH va Buyuk Britaniya sanksiyalari ostida, ular 12-apreldan boshlab importga to‘liq embargo qo‘ygan. Rossiya dunyodagi barcha nikelning 6 foizini ishlab chiqaradi, ammo yuqori sifatli metallga nisbatan uning ulushi sezilarli darajada yuqori – 14%.
Urushdan oldin “Nornikel” mahsulotlarining deyarli uchdan bir qismi AQSH va Yevropaga eksport qilingan, ular 2023-yildan boshlab importni qisqartirishni boshlagan. S&P Global Commodity Insights ma’lumotlariga ko‘ra, o‘tgan yili uning hajmi urushdan oldingi davrga nisbatan 28 foizga tushib ketgan.
Titan
Rossiya urushdan oldin titan bozorida taxminan 25 foiz ulushga ega bo‘lib, Amerikaning Boeing uchun jami yetkazib berishning uchdan bir qismini, Airbus uchun yarmini va Braziliyaning Embraer uchun deyarli 100 foizini ta’minlagan. Urushdan so‘ng Boeing va Airbus Rossiya titanidan voz kechish rejalarini e’lon qildi. 2023-yilda uning AQSHga yetkazib berilishi besh baravarga (47 million dollargacha) kamaydi. Yevropa davlatlari esa 244 million dollarga importni davom ettirdi.
Izoh (0)