Rossiya uranga boyitilgan snaryadlardan foydalangan — OAV

Rossiya muntazam ravishda Buyuk Britaniya Ukrainaga yetkazib bermoqchi bo‘lgan, Kreml rahbari Vladimir Putin “yadroviy komponentga ega qurollar” deb ataganiga o‘xshash uranga boyitilgan snaryadlardan foydalangan. Bu haqda Newsweek xabar berdi.

Ayrim rus harbiylari Rossiya Qurolli kuchlarning ba’zi tanklari xuddi shunday o‘q-dorilar bilan jihozlanganini aytgan. 21-mart kuni Britaniya Mudofaa vazirligi vakili Annabel Goldi “Chellenjer 2” tanklari bilan bir qatorda Ukrainaga snaryadlar, jumladan, tarkibida uranga boyitilgan snaryadlar yetkazib berish rejalashtirilayotganini aytdi.

Boyitilgan uran yadro yoqilg‘isining qo‘shimcha mahsuloti bo‘lib, yuqori zichliligi sababli harbiy maqsadlarda, jumladan, tank snaryadlarida ham qo‘llaniladi. Bunday o‘q-dorilarning zichligi qo‘rg‘oshindan 70 foizga yuqori, ular volfram va titan bilan qotishmada ishlatilishi mumkin. Britaniya Mudofaa vazirligi ham zamonaviy tanklar va zirhli texnikalarni mag‘lub etishda uran snaryadlarining yuqori samaradorligini qayd etadi.

Rossiya prezidenti Vladimir Putin bunga munosabat bildirgan holda ular “yadroviy komponentga ega qurollar” bo‘lib, ular Ukrainaga yetkazib berilsa, Rossiya bunga javob qaytarishi mumkinligini aytgan.

“Britaniya armiyasi o‘nlab yillar davomida o‘zining zirhli snaryadlarida urandan foydalanib kelgan. Bu standart element bo‘lib, yadro quroliga aloqasi yo‘q. Rossiya ham bu haqda biladi va ataylab noto‘g‘ri ma’lumot beradi”, — degan mamlakat Mudofaa vazirligi.

Rossiyaning uranga boyitilgan snaryadlari

AQSH Mudofaa vazirligi Rossiyaning ham uranga boyitilgan o‘q-dorilari zaxirasi borligini ma’lum qildi. 

“Albatta, ruslar ham ulardan keng foydalanadi”, — dedi Britaniya va NATOning Kimyoviy, biologik, radiologik va yadroviy mudofaa kuchlari sobiq qo‘mondoni, iste’fodagi polkovnik Hamish de Bretton-Gordon.

“Rossiyada uranga boyitilgan o‘q-dorilar Britaniya Ukrainaga yetkazib beradigan o‘q-dorilarga o‘xshashdir”, — deydi harbiy texnologiyalar bo‘yicha ekspert Devid Xembling. 

Xalqaro strategik tadqiqotlar instituti xodimi Uilyam Alberkning ta’kidlashicha, Rossiya 1982-yildan buyon bir necha turdagi uranli tank o‘q-dorilarini, jumladan “Svitets” snarydalar turini ishlatib kelmoqda.

Newsweek nashrining yozishicha, Rossiya ommaviy axborot vositalari uranga boyitilgan o‘q-dorilari bilan jihozlanishi mumkin bo‘lgan, modernizatsiya qilingan rus T-80BV tanklari haqidagi ma’lumotlarni e’lon qilgan.

2018-yilda rossiyalik ekspertlardan biri “TASS” agentligiga bergan intervyusida bunday o‘q-dorilardan foydalanish xalqaro standartlarga zid emasligini aytgan.  “O‘sha yili Rossiyaning boshqa davlat OAVlari ham bu haqda yozgan”, — deyiladi xabarda.