“Taksi” franshizasining birinchi filmi chiqqandan keyin mashhur bo‘lgan aktyorlari qanday ko‘rinishga ega va hozir nima bilan shug‘ullanayotgani haiqda ma’lumot beramiz.
Sami Naseri
- Daniel Morales — taksi haydovchisi
- Film chiqqanda — 37 yoshda
Taksi haydovchisi Daniyel rolini kelib chiqishi arab bo‘lgan fransuz aktyori Sami Naseri ijro etgan.
Otasi jazoirlik, onasi normandiyalik bo‘lgan, u 1961-yil 2-iyulda Parijda tug‘ilgan va bolaligidanoq aktyor bo‘lishni orzu qilgan. 1990-yillarning o‘rtalarida Naseri televideniyeda va qisqa metrajli filmlarda rol o‘ynaydi. Bir kuni yosh aktyor Lyuk Bessonning e’tiborini tortadi va “Taksi” filmining birinchi qismida bosh rolni o‘ynashga taklif qilinadi. Bu rol o‘sha paytda 37 yosh bo‘lgan aktyorga mashhurlik olib keladi, natijada rejissyorlar e’tiboriga tushadi.
Kinodagi shon-shuhratiga qo‘shimcha ravishda, Naseri qonunni bir necha bor buzgani bilan mashhur. U jarohat yetkazish, haqorat, mast holda mashina haydash va tezlikni oshirganligi uchun turli jazolarga hukm qilingan.
2005-yilda Naseri Parijdagi restoranlardan birida bir odamga qo‘lidagi kuldon bilan hujum qilgan. Buning uchun aktyor ikki oylik qamoq jazosiga hukm qilinadi. 2006-yilning dekabrida u politsiyachini haqorat qilgani uchun olti oylik qamoq va 8000 yevro miqdorida jarimaga tortilgan. 2007-yilda u Eks-an-Provensdagi qo‘riqchilarga va o‘zi davolanayotgan tibbiyot markaziga hujum qilganlikda ham aybdor deb topilgan.
Hozir aktyor 63 yoshda, uning filmografiyasida 50 dan ortiq film mavjud. Oxirgi filmi 2023-yilda chiqqan “Muhojir” rus-fransuz filmidir. Unda Naseri giyohvand moddalar sotuvchisi rolini o‘ynagan.
Aktyor aktrisa Mari Giyarga uylangan edi, ammo er-xotin ajralishadi. Aktyor ikki yildan beri o‘zidan 33 yosh kichik Sofiya Afina ismli qiz bilan uchrashadi.
Frederik Difental
- Politsiya inspektori — Emiliyen Kotan-Kerbale
- Film chiqqanda — 30 yosh
-R6ZDqgTt.webp)
Frederik Difental 1968-yil 26-iyulda Fransiyada tug‘ilgan. Aktyor “Taksi” franshizasidagi roli bilan mashhur bo‘ladi, u anqov politsiyachi Emiliyen rolini o‘ynaydi. Hozirda ham filmlar va fransuz teleseriallarida rol o‘ynashda davom etmoqda. 2002-yilda u bilan bosh rolni o‘ynagan “Qor” to‘liq metrajli filmi chiqdi.
Difental hozir 56 yoshda va ikki marta ajrashgan. Dastlab u aktrisa Gvendolin Amonga uylangan, ularning 2005-yilda tug‘ilgan o‘g‘li bor. Ikkinchi marta esa 10 yillik munosabatlaridan so‘ng Stefani Segin bilan 2023-yilning yozida turmush quradi.
Yaqinda aktyor iyul oyida o‘g‘rilik qurboni bo‘ldi, u Instagram’dagi sahifasida velosipedi o‘g‘irlanganini ma’lum qildi. Difental xushmuomalalik bilan velosipedini qaytarib berishlarini so‘radi.
Marion Kotilyar
- Film namoyish etilganda u 23 yoshda edi
-vCCyRtig.webp)
Aktrisa birinchi marta 6 yoshida, 1981-yilda bolalar spektakllarida sahnaga chiqadi. Kotilyarning kinodagi yutug‘i “Taksi” filmi bo‘lib, unda u bosh qahramonning qallig‘i rolini o‘ynagan. Aktrisa “Taksi 2” va “Taksi 3” filmlarida ham rol o‘ynagan.
Aktrisaning Gollivuddagi faoliyati ham juda muvaffaqiyatli bo‘ladi. 2003-yilda u Tim Byortonning “Katta baliq” fantastik dramasida, 2006-yilda Ridli Skottning “Yaxshi yil” romantik komediyasida Rassell Krou ijro etgan londonlik millionerning qalbini zabt etgan fransuz ayoli rolini o‘ynaydi.
Edit Piaf hayotiga bag‘ishlangan “Pushtirang hayot” biografik filmi uchun aktrisa “Oskar” bilan bir qatorda “Sezar”, “Lyumyer”, BAFTA va “Oltin globus” mukofotlarini ham oladi.
Hozir u 48 yoshda va kino yulduz ekranlarni zabt etishda davom etmoqda. Kotilyarning so‘nggi filmi “Li” jangari dramasi bo‘lib, unda Keyt Uinslet bilan birga rol o‘ynaydi.
Aktrisa 2007-yildan beri fransuz kino yulduzi Giyom Kane bilan munosabatda. 2008-yilda ular unashtirildi. Juftlikning ikki farzandi bor — Marsel (2011-yilda tug‘ilgan) va Luiza (2017-yilda tug‘ilgan). Filmlarda ishlashdan tashqari, aktrisa Fransiyada ikkita restoranga egalik qiladi va atrof-muhit muammolari bilan faol shug‘ullanadi.
Emma Viklund
- Film chiqqanida u 30 yoshda edi
-Vv5Jrjbb.webp)
Shvetsiyalik aktrisa va model 1968-yil 13-sentyabrda Stokgolmda tug‘ilgan. Uning otasi shved, onasi Kongo fuqarosi. Viklund taksi haydovchisi haqidagi franshizaning to‘rtta qismida ham rol o‘ynagan. 2003-yilda u aktyor Hans Viklund bilan turmush qurgan. Ularning 23 va 21 yoshli ikki farzandi bor.
55 yoshli model hozir Stokgolmda yashaydi va uning Emma S. Skincare nomli terini parvarish qilish biznesi bor. U muntazam ravishda oilasi, hamkasblari va uy hayvonlari bilan tushgan suratlarini Instagram’dagi obunachilari bilan baham ko‘radi.
Bernard Farsi
- Komissar Jilber rolini o‘ynagan
- Film chiqqanida — 49 yoshda
-5fgs0ywY.webp)
Fransuz aktyori Bernard Farsi o‘zining teatr va televideniyedagi faoliyatini 1970-yillarda boshlagan. “Taksi” filmi chiqqanida u o‘nlab filmlarda, jumladan, Bertrand Bliening “Bizning tarix” filmida suratga tushgan edi.
Eksentrik va tor fikrli politsiya komissari rolining ajoyib muvaffaqiyatidan so‘ng, aktyor 2000-yillarda o‘nlab filmlarda rol o‘ynaydi. Farsi “Bo‘ri birodarligi” va “Asteriks va Obeliks: Kleopatra missiyasi” filmlarida o‘ynagan.
Hozir aktyor 75 yoshda. Ekranlarda kamroq ko‘rina boshlaganiga qaramay, u “Taksi” franshizasining hamma qismida ishtirok etgan, so‘nggi 5-qism 2018-yilda chiqarilgan.
Yaqinda aktyorning beshinchi epizodda suratga tushish unga oson bo‘lmaganini tan oldi, chunki uning yonida odatdagi ijrochilar jamoasi yo‘q edi. Beshinchi epizodda original filmdagi yulduzlar tarkibidan hech biri (Farsining o‘zi va Eduard Montutdan tashqari) rol o‘ynamagan. Aktyorning so‘zlariga ko‘ra, o‘zini xuddi boshqa birovning oilasida bo‘lganidek, suratga olish maydonchasida noqulay his qilgan.
Edvard Montut
- Politsiya xodimi — Eleyn
- Film chiqqanda — 28 yoshda
-0qcyjnVw.webp)
Eduard Montut juda yoshligida oilasi bilan Parij chekkasiga ko‘chib o‘tadi. U birinchi marta 1990-yilda “Jan Galmo” filmida debyut qilgan. Aktyor 1992-yilda “Gol” seriali orqali mashhurlikka erishadi. Aynan o‘sha yerda u Frederik Difental bilan tanishib qoladi va u bilan keyinchalik ko‘plab loyihalarda birga ishlaydi. Bernard Farsi singari Montut ham politsiyachi Eleyn rolini o‘ynab, “Taksi” franshizasining barcha besh qismida ishtirok etadi.
Hozir fransuz aktyori 53 yoshda, u kino va televideniyedagi faoliyatini davom ettirmoqda. 2022-yilda uning ishtirokidagi “Ambuazedagi qotillik” trilleri chiqdi.
Aktyor Lubna Montut bilan turmush qurgan, ularning Naxil ismli o‘g‘li bor.
Izoh (0)