“Toshkent malikasi” Nargiza Olimova yoshi katta tomoshabinlarga “Seni izlab” filmi orqali yaxshi tanish. Aslida raqqosa bo‘lgan aktrisa faoliyati davomida bir nechta filmlarda rol ijro etgan. Rollarining soni kam bo‘lsa-da, unga yaxshigina shuhrat olib kelgan. Xo‘sh, retro filmlarda o‘ziga xos rollarni ijro etgan Nargiza Olimova ayni kunlarda nimalar bilan band? Bu savolga javob olish uchun u bilan suhbatlashishga qaror qildik.
“‘Toshkent go‘zali’dan keyin mashhur bo‘lib uyg‘onganman”
— 1988-yilda ilk marta go‘zallik tanlovi o‘tkazildi. Tanlov bilan bog‘liq ma’lumotlar gazeta-jurnallarda e’lon qilindi. O‘sha paytlarda yosh, har narsaga qiziquvchan qiz edim. Tanlovning yakuniy natijalarini eshitib rosa jahlim chiqqandi. Chunki o‘sha yili donesklik qiz “O‘zbekiston malikasi” sifatida e’lon qilingandi. Qo‘rqmay tanlov tashkilotchilariga qo‘ng‘iroq qilib arzimni aytganman. Shunda ular men bilan yaqindan tanishishni va kelgusi tanlovda ishtirok etishga taklif qilishgandi. Rostini aytish kerak, kutilmagan qarorim juda qimmatga tushgan. Chunki u paytlarda bunday tanlovlarda ishtirok etish hayosizlik sifatida qoralanar edi. Shunday bo‘lsa-da, ortga qaytishni istamadim, shu bois 1989-yili o‘tkazilgan tanlovda hakamlar hay’atidan cho‘milish kiyimida chiqilishi kerak bo‘lgan shartlardan voz kechib o‘rniga milliy kiyimda chiqishni iltimos qildim. Tanlovdan keyingi voqealar xuddi shirin tushdek sodir bo‘lgan. Bir kundayoq mashhur insonga aylanib uyg‘ongandek bo‘lganman.
“Said Ahmad meni rolga tanlagan ekan”
— Kinoda suratga tushishni hayolimga ham keltirmaganman. Tabiatan mas’uliyatli insonman, zimmamga ilingan vazifani sidqidildan bajarishga harakat qilaman. 1991-yili marhum ijodkor Saida Zunnunovaning “Go‘dak isi” nomli hikoyalari asosida film olinadigan bo‘libdi. Kastingga taklif etishdi, hamma qatori ishtirok etdim. Rosti, filmda ishtirok etishni umid qilmagandim. Chunki men bilan birga Madina Muxtorova, Lola Eltoyeva, Ra’no Zokirova kabi yaxshi aktrisalar ham kasting topshirishgandi. Ammo kasting videolarini ko‘rgan Said Ahmad “Nargizaning qiyofasida o‘zbek ayolini ko‘ryapman”, deb rolga meni tanlabdi. Shundan keyin film muvaffaqiyatli chiqishi uchun chin dildan harakat qildim. Marat Muqimov rejissorligida suratga olingan “Seni izlab” filmi kutilganidan ham yaxshi natijaga erishdi. Unda professional aktyorlar bilan birga rol ijro etganim ham katta yutug‘im bo‘lgan.
“Men aktrisa emas, raqqosaman”
— “Seni izlab” filmining suratga olish ishlari yakunlanishi bilan rejissor Davron Abdullayevning “Qasamyod kuni” nomli filmida suratga tushdim. Filmda Nabi Rahimov, Ali Hamroyev kabi ustoz aktyorlar ham suratga tushgan. Rejissor bosh rollardan birini menga ishonib topshirgan va turmush o‘rtog‘im rolini Rustam Sagdullayev, o‘g‘limni esa Doston Ubaydullayev ijro etgan. Mashhur aktyorlar suratga tushgan film nega ommalashmadi, degan savol ko‘pchilikni qiziqtirishi mumkin. Chunki film premyera qilingan kuni uni katta mablag‘ga malayziyalik prodyuserlar sotib olishgan. Shu bois, film umuman yurtimizda namoyish etilmagan.
Men nechta filmda suratga tushishimdan qat’iy nazar baribir aktrisa emasman. Men uchun raqs san’ati birinchi o‘rinda. Shu bois, rollar ijro etishga intilishim u qadar kuchli bo‘lmagan. Ammo yaqinda Hilol Nasimovning taklifiga ko‘ra “Vatan ostonasi” filmida suratga tushdim. Chunki bu rejissor bilan avval “Qasamyod kuni” filmida birga ishlagandik. Hilol Nasimov u paytlarda yordamchi bo‘lib ishlardi. Uning filmlari hayotdan olinadi.
“Raqsda ham dushmanliklar bo‘lgan”
— Har bir insonga ma’lum sohaga qiziqish bo‘ladi, kimdir to‘siqlarni yengoladi yoki osongina taslim bo‘ladi. Akalarim raqqosa bo‘lishimga jiddiy qarshilik qilishgan. Ammo mehnatim bilan ishonchlarini oqlab, 25 yil davomida sahnada ijod qildim. Juda ko‘plab xonandalarning konsert dasturlarida ishtirok etdim. “O‘zbekiston” ansambli bilan ko‘plab gastrol safarlarida bo‘ldik. Raqqosa bo‘lganimdan hech qachon afsuslanmayman.
Ammo ijodim qiyinchiliklardan holi bo‘lgan, hammasi oson kechgan deyolmayman. Hamma sohada bo‘lganidek raqsda ham menga dushmanchiliklar bo‘lgan. Masalan, muhim konsertlarda sahna liboslarimni o‘g‘irlatib qo‘yganim yoki sahnaga chiqishimdan oldin ko‘ylagimni qaychilab qo‘yishgan paytlari ham bo‘lgan. Chunki atrofdagilar o‘zimnikidan boshqa kostyumni kiyim sahnaga chiqmasligimni yaxshi bilishardi. Bunday qing‘irliklar har bir insonning hayotida bo‘lishi mumkin. Muhimi, ko‘ngilni cho‘ktirmay, oldinga qarab intilish kerak.
“Go‘zallik oddiylikda...”
— Oddiylikni yaxshi ko‘raman. Shu yoshimga qadar qoshimni termaganman. Yuzim va sochimni oddiy qatiq bilan oziqlantiraman. Zarurat tug‘ilmasa, yuzimga hech narsa surtmay faqat lab bo‘yog‘idan foydalanaman. Albatta, maxsus tadbirlar uchun pardoz qilishim mumkin, ammo bu hol har kuni ham bo‘lavermaydi.
Sahna abadiy emas. Har narsaning vaqt soati bor, ancha yillardan beri raqs bilan shug‘ullanmayman. Ammo san’atni butunlay tark etganim yo‘q, madaniyat tizimida faoliyat yuritaman. Siyosatdan ham uzoq emasman, desam bo‘ladi. Ayni kunlarda “O‘zbekkonsert” davlat muassasasida “Milliy raqsni rivojlantirish” bo‘limida tashkil etilgan. Unda bosh mutaxassis sifatida faoliyat yuritaman. Bu bo‘lim milliy raqsni rivojlantirish, yo‘l qo‘yilayotgan kamchiliklar o‘rganadi, — deydi Nargiza Olimova.
Mavzuga doir:
- “Tutash taqdirlar”, “Zebuzar” va raqqosalar bosh rollarni ijro etgan boshqa mashhur film va seriallar (video)
- Sherali Jo‘rayevning ko‘p yillik hamkori, 22 yoshida unvon olgan, “Bahor”da charxlangan: taniqli raqqosa, O‘zbekiston xalq artisti Rushana Sultonova 56 yoshda (foto)
- Zarina Nizomiddinova, Rayhon Ulasenova va o‘zbek shou-biznesidagi faoliyatini raqqosalikdan boshlagan boshqa mashhurlar (foto)
Izoh (0)